如果男仔隻手太緊，長期習慣咗之後，就有機會因為陰道畀唔返一個咁強嘅刺激而導致可能出現射精障礙
咁女仔呢？
如果自慰強度太高，會唔會出現類似嘅情況？
例如我用Womanizer（因為真係好舒服），但我又驚性行為嘅時候會好難高潮，影響男朋友自尊心
所以想問呢個問題
唔該晒 
Hello 知道你都好著緊男朋友嘅感受，但都唔洗太擔心。
首先，無論男女，自慰強度高同高潮習慣並冇必然關係。而且自慰都唔會影響到性行為嘅體驗，因為自慰同性行為都係完全唔同嘅體驗，唔同嘅性刺激或者方式都會帶嚟唔同嘅感覺。而且每個人都有唔同嘅敏感點，可唔可以係性行為中達到高潮，更大程度都係在於有冇刺激到敏感點，或者性行為當下嘅心情、氣氛、前戲有冇做足等等。平時自慰嘅力度或者強度呢啲習慣，其實影響反而唔大。
另一方面，如果擔心會影響男朋友自尊嘅話，都可以嘗試同佢溝通吓，調整下雙方對性行為嘅期望。雙方都要明白，有時性行為之中有冇達到高潮，未必同雙方性能力有關係，唔同因素都可能會影響到個情況，例如上面提過嘅心理因素、環境氣氛等等，亦可能有啲人本身體質就唔容易達致性高潮。所以都唔洗太擔心會令高潮變得困難。而且性行為都有好多唔同嘅方式，唔一定必要追求高潮，都一樣可以達致性歡愉。
所以其實自慰嘅習慣係唔會影響到性行為之中會唔會達致高潮。如果想性行為時更加容易達到高潮，或者想環境氣氛做得更好，都可以參考返呢一個post：《Stickypedia系列 – 前戲：一道美味的前菜的準備功夫》