濫交後係咪人生就玩完

我曾經係一個濫交嘅女仔,因為當時同家人關係不好同埋啱啱移民適應唔到所以先至會變成咁,但係本身自己本性其實都係一個乖嘅人,所以遇到現任,先至可以叫做真真正正有拍拖嘅感覺,同埋做返一個乖女,做返自己。我一開始我已經同男友講過我嘅過去,因為我覺得我要認真同一個人開始必須要等佢知道並接受我嘅過去先,呢個係對佢嘅尊重,亦都唔想第日佢喺人哋口中知道我嘅過去係咁差。咁佢都接受,亦都拍咗一兩年拖,大家都好珍惜大家,好愛大家。

但係有一次朋友聚會,我以前其中一個SP friend 撘friend 之下嚟咗,咁我同個SP兩個亦都扮唔識。但係我一開始拍拖之前有逐一俾男友睇過我以前啲嘢,不過我諗我男朋友當下冇認到個SP出嚟,事後我亦都冇同男朋友講,因為我覺得其實我一開始拍拖都有坦白講晒、而且如果我再講落去只會破壞大家關係。但係佢今日應該係喺其他朋友口中得知嗰個SP個名,所以就聯想到可能我都識呢個人,因為我一開始坦白嘅時候都有提及過呢個名。佢問我識唔識嘅時候我亦都坦白。然後佢就有啲唔開心覺得我唔尊重佢點解要係朋友口中先知道,佢仲話其實都係諗住問吓我,佢根本覺得我啲SP多到可能就算喺嗰個朋友聚會上面都唔認得 ,所以只係好奇問吓我。

其實究竟坦白係咪做錯?我係咪做錯咗,我係咪真係應該同男朋友講扮唔認得就算?但係我真係唔想呃佢,我當下唔同佢講都係因為我唔想再講一啲大家都知嘅嘢去破壞大家嘅關係。

係咪我嘅過去令到我冇辦法再係正常嘅感情當中生存?就好似啲更新人士再出去社會都無法被接納。

Hello 首先想讚吓你先!好欣賞一開始願意對你嘅男朋友坦白關於你嘅過去,相信當時你都鼓起左一定嘅勇氣,亦都好睇得出你好愛你嘅男朋友,好尊重你嘅男朋友。

知道你唔開心好迷惘,可能會有後悔嘅情緒。但每個人都有自己嘅過去,會有自己嘅經歷都係好正常,並唔會話因為曾經有過好多伴侶,你嘅人生就係有問題或者出咗錯。你選擇咗對你男朋友坦白你嘅過去,而你男朋友當時都有接受到,就代表你哋雙方其實都好重視對方。

不過,可能因為你嘅男朋友好重視你,所以當發生朋友聚會嗰件事嘅時候,佢並無辦法了解清楚你嘅想法,亦都出現咗不安全感,所以可能因為咁導致左佢不愉快嘅感覺。

不過首先記住唔好怪責自己先,你嘅經歷你嘅過去並唔係有咩錯,你個人都唔係有咩問題。要將問題從個人到抽返出嚟先,將問題同人分開,依家要解決嘅係你哋之間「溝通不足而造成誤會」呢個問題,而唔係要解決你過去嘅經歷。

或者你都可以嘗試搵個機會,靜心坐低,盡量唔帶有情緒咁,同你男朋友好好溝通下。你可以向你男朋友表明返,你明白佢唔開心嘅位係啲咩。同時,你都可以向佢表達返你嘅掙扎同埋想法,例如你都有種不安全感,正正因為你好重視佢好愛佢,所以先憂慮如果你坦白講出嚟嘅話驚會破壞到大家嘅關係。你可以向佢表明你嘅掙扎,等對方都能夠明白到你嘅感受同埋想法。

最後你都可以自己諗清楚,如果再發生類似嘅情況,會唔會想坦白講清楚,定係都唔想講出嚟。呢個都係你自己嘅想法,冇話邊個選擇先啱,畢竟呢啲都係比較私人嘅經歷。如果你認為你可以坦白講清楚嘅話,你都可以承諾你男朋友,下次會講清楚。如果你唔想講嘅話,你都可以考慮同你男朋友講返你嘅想法,俾佢知道可能都係太過私人而唔想講,或者你好擔心會影響到關係而唔想講。

記住,你嘅經歷唔係有咩錯啊,唔好覺得自己嘅過去就會完完全全規範死自己。如果可以嘅話,希望你都可以同你男朋友平心靜氣,好好咁溝通,等你哋雙方都更加了解清楚對方嘅想法。

希望可以幫到你哋,你哋關係可以變得更好啦。