同男朋友發生性關係之後先發現係排卵期日子，咁岩我地個次冇用套。隔左3/4日先去家計會先去食藥，食120小時個隻，食完既當晚就流左好多黃黃地、白白地、杰杰地既液體出黎。想問下咁樣係咪粒藥冇發揮到功效就排左出黎？定係有啲咩排斥既狀況，要去家計會再食多一次
Hello~事後丸嘅作用係透過大量嘅荷爾蒙抑制排卵，同時亦會令子宮頸嘅黏液增多，阻止精子通過子宮頸進入到子宮，避免精子同卵子結合。另外，都會令子宮內膜增厚，令受精卵無法係子宮壁內着床，因此排卵後即使有性行為，只要係指定時間內食事後丸，都可以做到緊急避孕嘅效果嘅。不過當然，唔安全嘅性行為之後愈快服用效果愈好。你講嘅黃白色液體較大機會係排卵期嘅分泌物，屬於正常嘅現象。而好似我上面咁講，就算身體已經排咗卵都好，事後丸都可以透過令子宮頸嘅黏液增多，阻止精子通過子宮頸進入到子宮，避免精子同卵子結合。所以只要喺時限內食咗事後丸，又冇屙嘔，都係唔需要擔心懷孕，亦都唔需要去食多次嘅～
另外都想提提你，食完事後丸之後嘅一個星期內有機會出現撤退性出血。食完事後藥後嘅岀血係因為子宮內膜剝落所導致嘅，即使有排卵，都可以令受精卵跟住內膜一齊排出，避免懷孕，依一次嘅岀血算係月經（因為無受精卵著床），所以月經週期都可能會受影響，下一次月經嘅日期都會受影響，例如上一次月經係10月2日，10月15日使用事後避孕藥，10月17日出血，咁下次月經應為11月17日左右。另外， 事後丸係唔可以作為常規嘅避孕方法 ，只可以作為一種補救措施，且其避孕有效性遠不如其他規律使用嘅荷爾蒙避孕法（如避孕藥）。而喺服用緊急避孕藥之後，呢個月經週期剩餘嘅時間，同埋之後嘅日子，都一定要使用其他高效嘅避孕方法先可以避免意外懷孕。
事後藥嘅效果係非常短暫，淨係針對一次嘅不安全性行為，就住嗰一次嘅性行為去抑制排卵、增加子宮頸黏液分泌令精子難以通過、改變子宮腔環境令受精卵難以著床，但我地都唔能夠保證身體會幾時再排卵，加上正如上面所講，如果身體未排卵嘅，事後藥會抑制排卵，如果排咗卵嘅，就令受精卵難以著床，但我地係唔會知粒藥確實透過邊一種方式幫我地避孕，所以如果擔心懷孕嘅話，建議喺性行為之後嘅11日進行驗孕，呢個係唯一客觀可靠嘅方式去知道自己有冇懷孕。
最後，都想提醒翻，一次月經週期最多可以食一次事後藥，如果未準備好有小朋友嘅話，無論發生任何形式嘅性行為，都要全程正確咁使用安全措施，例如安全套，事前避孕藥等，避孕成效會高好多🫶🏻。