今日睇唔開第一次搵性工作者
全程有套插入
完事後非常後悔 面對不了家人
還有非常擔心性病問題
是否需要3個月才可作檢查？
Hello~首先，性病係屬於傳染病，不分年齡、性別、種族，一般透過性接觸，不論係性交、肛交、口交或生殖器之間皮膚接觸，就有機會經由血液、精液或其他體液感染性病。而性病一般可以分為細菌型性病，或者係病毒型性病。前者大多數都可以完全根治，而後者大多數未有藥物可以完全根治，但可以控制病情，例如愛滋病，性病疣（椰菜花）。因為性病嘅傳染係要有體液嘅交換，所以有用安全套嘅話感染性病嘅風險相對嚟講會低啲。至於傳播途徑，除咗上述提及到嘅，性病主要以血液、精液、陰道分泌或其他體液作傳播媒介。性病一般經性接觸 (包括口交、肛交、陰道性交) 傳染。而有啲性病能夠透過皮膚傳染，例如椰菜花等，即係話就算用咗安全套都好，安全套cover唔到嘅其他位置都有機會傳染到性病。
你會覺得去搵性工作者就會感染性病，其實係受到社會文化中對性工作者嘅歧視同污名化，將佢地同「污糟」、「性病」連結。但其實好多性工作者為咗生計同埋自己嘅安全同埋健康，係會恆常去做檢查，同埋會使用安全套保障安全。但係有時有啲客會拒絕使用安全套，甚至性行為中途除套，加大性工作者感染嘅風險。所以就算對方係性工作者係都唔代表佢一定有感染性病，性工作都係工作，性工作者都值得被尊重。
喺感染性病之後會有一段時間嘅潛伏期，係喺呢段時間裏面病毒或者病菌潛伏喺體內唔會有任何病徵。而即使你已經有病徵都好，都需要過一段空窗期（一般來講係三個月），等病毒嘅數量累積多啲，先至可以透過唔同嘅方法檢驗出病毒/病菌。以下就係一啲常見性病嘅潛伏期：
生殖器疱疹（疱疹二型）：約2-5天
淋病：約1-14天
滴蟲：約4-20天
衣原體感染：約7-21天
梅毒：約9-90天
性病疣（椰菜花）：約 1-8個月，平均為3個月
上嘅時間都係一個平均數值，有好多人過咗呢段時間都未出現病徵，其實都係好正常嘅。除咗要睇你當時接觸到嘅病毒量，仲要睇你本身身體嘅狀況健唔健康。一般坊間一啲免費嘅性病快速測試都需要大概係3個月左右嘅時間，身體嘅病毒量先至可以上升到可以檢查到嘅水平。係空窗期期間，雖然檢驗唔到，但係都可以傳染俾其他人嘅。而且愛滋病嘅潛伏期就半年到10年都有，所以感染咗愛滋病之後未必真係會立即發病嘅。
即係話只要你係進行過一次唔安全嘅性接觸之後大概3個月，做一次全面嘅性病檢查，其實已經可以檢查到全部嘅性病。另外，如果係空窗期內再有一個高風險嘅性接觸，其實就要重新開始計算三個月，當你去檢查嘅時候，其實就只能夠反應三個月之前嘅性接觸有無令你感染性病。
如果真係感染咗性病嘅話，就一定要積極進行治療。因為如果性病得到治療嘅話，致命嘅風險都係好低嘅。而當病毒或者病菌嘅數目受藥物控制，減低到冇辦法被檢測到嘅時候，咁即使你同其他人進行性行為，性病都唔會傳染俾其他人（Undetectable = Untransmittable)。所以及早發現及早治療最重要，同埋記住要定期檢測。
如果你未決定去邊度驗血，建議你可以選擇去以下機構做免費嘅性病測試。
政府社會衛生科服務診所：各類型性病檢查（較全面，能即時知結果及比藥）
關懷愛滋：25歲或以下青少年、男男性接觸者－愛滋滋病病毒／梅毒／淋病／衣原體／丙型肝炎
香港愛滋病基金會：愛滋滋病病毒／梅毒／丙型肝炎
再思社區健康組織 (C.H.O.I.C.E.) ：愛滋病病毒／梅毒
暫時可以先留意自己身體有無出現明顯病徵。如果已經出現下體痕癢、小便刺痛、分泌物異常、下體生粒粒等病徵時，就可以先及早求醫。不過如果未有出現明顯病徵的話，都建議考慮三個月（三個月已經過左大部分性病嘅空窗期）後，再一次過去做一個全面嘅性病檢測，會比較準確🫶🏻。
我見有d醫學中心話14天空窗期可驗血 是否有效？
因為唔同性病嘅空窗期都唔一樣，一般嚟講三個月先至過晒大部份性病嘅空窗期，14日就去驗血嘅話能夠籂走嘅性病並唔多，所以建議等三個月後先至去做檢查，個結果會可靠好多。
佢話會先驗小便，再抽取陰莖DNA樣本，最後驗血
是否可靠？
Ps 佢亦建議3個月後再驗一次血覆檢
Hello你好啊
相信你講梗嘅係HIV p24抗原抗體測試，佢淨係可以檢測到HIV病毒，而唔能夠檢測到其他性病嘅。加上第四代HIV抗原抗體測試嘅空窗期為14至21日, 時間長短因每個人嘅免疫系統反應而有所不同，所以正如上面同事所講，最可靠都係等三個月後再做一個做一個全面嘅檢查，咁就可以清楚了解到自己身體狀況
明白好擔心自己身體狀況，係到都想分享下，如果患上性病，都唔係世界末日，醫學昌明，有啲嘅性病可以痊癒，亦有啲可以透過藥物控制，將病毒量控制到不可被檢測到嘅程度，唔會傳染俾其他人，對生活唔會有影響。
我有另一半 我真係唔知點面對佢
好內疚
其實每個人都明白自己係有性需要嘅，不過當呢件事擺喺一段戀愛關係入面就會截然不同。因為戀愛關係入邊會有佔有慾，同埋會有「出軌」嘅概念。而如果呢段戀愛牽涉性關係嘅話，咁為咗保障對方嘅健康，都需要比對方知道有感染性病嘅風險。當然我哋明白要同對方坦白係好困難嘅，因為唔知對方嘅反應會係點，亦都好驚會破壞呢段關係。但係如果唔講嘅話就會一直有條刺喺個心入面，亦都唔夠膽放膽咁去愛一個人，好驚會比對方嫌棄
。
相信你都明白每個人都需要為自己做過嘅事情附上責任，我哋唔到為你做任何選擇，亦冇辦法改變未知嘅未來。不過我哋會建議你同另一半坦誠咁溝通，俾佢知道你而家嘅感受同諗法。然後一齊尋求共識去跨過呢個難關。記住，性病唔係世界末日，就算真係中咗都好，都係有辦法控制嘅，可以擁有正常嘅生活同埋健康嘅下一代，最緊要係唔好比呢種恐懼吞噬左自己，你個人嘅價值唔會因為有或者冇性病而產生改變，你都仲係你🫶🏻
我作左d藉口叫另一半唔好同我行房住
我唔敢同佢坦白 我好驚無左佢
係我錯 係我賤格
我最後同另一半坦白左…
你好，你鼓起勇氣同伴侶坦白，係一個負責任以及有為對方著想嘅行動，係好叻㗎！可能喺坦白後會令大家經歷好多唔同嘅情緒，但係溝通背後都係希望段關係可以維持，希望你哋溝通順利，能夠達成共識同互相理解！
請問hsv2係咪一定會出水泡 過左5日潛伏期係咪姐係安全？
唔係架，唔少病毒感染者都係從來都冇症狀，或者症狀非常輕微，所以都唔可以靠咁樣去斷定係咪安全。最好嘅方法都係喺好似上面同事提過咁，係空窗期過咗之後做個詳細嘅測試啦。
淋病 非淋呢d 驗尿驗到既性病有無空窗期？
基本上所有病毒型嘅性病都會有空窗期。不過淋病呢女嘅性病空窗期同潛伏期一般都會比較短，係會比較快就能夠驗得到嘅，具體嘅時間就根據個人體質而定。一般嚟講，我哋都會建議係唔安全嘅性行為之後三個月進行一次全面嘅性病檢測。因為三個月已經過晒大部份性病嘅空窗期，如果到時嘅結果係陰性嘅話就能夠確保冇性病啦！
我係高危性行為後第4天先去驗左小便同hpv採樣
結果為陰性
但尿道口係第5晚有d痕癢 會否係hpv採樣整到？ 因棉花棒要放入尿道口
今日第6日睇左普通科醫生，醫生話無乜事， 可能係我心理作用，開左消炎藥和藥膏給我
有需要再驗尿嗎？ 血液測試會遲d先做 因空窗期未過
Hello~因為藥物嘅空窗期未過，所以你呢一次嘅驗尿結果其實都未係最準確，例如HPV嘅空窗期係7至14日，所以你第四日就驗係唔準確嘅。而通常性病嘅潛伏期都唔會得四日咁短，所以比較大機會係好似醫生咁講係心理作用。
暫時可以先留意自己身體有無出現明顯病徵。如果已經出現下體痕癢、小便刺痛、分泌物異常、下體生粒粒等病徵時，就可以先及早求醫。如果未有出現明顯病徵的話，都建議考慮三個月（三個月已經過左大部分性病嘅空窗期）後，再一次過去做一個全面嘅性病檢測，會比較準確🫶🏻
因為hpv DNA 採樣 及驗尿，檢查中心話1天空窗期就可以，所以先咁快去左做
另外想問驗小便應該驗頭段定中段，我驗果間係頭段， 但有d係中段，哪樣比較可靠？
如果你嗰間中心係可靠嘅話，咁應該係冇問題嘅，最緊要係有專業資格嘅醫生同你做評估。至於驗尿方面，其實只要身體內嘅病毒數量夠高，無論係頭段定中段其實都能夠檢測得到嘅。
咁知唔知道Mhs呢間中心可靠嗎？