好驚 關於龜頭&包皮

因為細個學童身體檢查,已經有醫生姑娘話我包皮過長,所以知道咗就冇反過包皮,又怕痛就一直都冇做手術
直到大約半年至一年前,我25歲左右,發覺條J有啲痕,又有啲黃色黐立立嘅分泌物喺包皮入邊,就諗住沖涼嘅時候洗下佢
洗洗下就成個包皮劣咗落去,露晒成個龜頭出嚟,個下嚇到我暈,因為龜頭嗰陣勁敏感,係咁想劣返包皮上去都好難,好彩最後都劣得返上去
之後都有一直小心咁洗包皮入邊同埋龜頭,會慢慢劣少少包皮,一直唔敢劣到落底
但係,去到而家都好,雖然洗得好乾淨,甚至會落鹼液去洗龜頭,只係冇將包皮劣到落最底,但係啲黃色分泌物仲係兩日左右就會出現,仲要都幾臭下,到底係點解?
我一直以為係啲包皮屎,或者係廿幾年冇洗包皮入邊太污糟,所以先有呢啲情況,但最近查過,好驚係出事,發覺啲性病好似都有呢啲情況,但我好認真咁研究過,啲分泌物係由包皮繫帶滲出來,又唔係喺尿道走出來,所以應該唔係尿道炎?但咁大個仔都未做過愛,點都唔會有性病掛?

所以最主要係想問吓

  1. 我25歲先至第一次反包皮,有冇問題?
  2. 如果要洗包皮,應該要點洗?係咪應該將包皮劣到最底先得?會唔會出現包皮劣咗落去之後反唔返上嚟?
  3. 啲黃色分泌物係咪就係所謂嘅包皮屎?或者太污糟先有?如果係點解我日日洗都仲會有?
  4. 如果唔係嘅話,點解會有咁嘅情況?

我應該點做好… 好驚係有性病… 但完全冇同人搞過野喎我… 最多就係日日打飛機… 點會咁…

Hello~首先,如果你以往都冇恆常翻開包皮嘅習慣,咁喺初期會覺得有啲唔舒服或者難以翻開都係好正常嘅。包皮同其他皮膚一樣,都係有彈性嘅,但如果一直以嚟都冇活動佢嘅習慣,包皮都需要時間去適應拉扯嘅感覺。初期嘗試嘅時候可以按照身體嘅反應去調節,千祈唔好強行將成個包皮翻開,有機會導致包皮卡住需要求醫處理。

而如果你能夠自行用手將包皮翻開露出成個龜頭(雖然過程中會感覺到少量不適)但基本上都唔係有過緊嘅情況。如果係包皮過緊嘅話,一般都無法自行將包皮翻開露出整個龜頭,咁先至需要割包皮。而割包皮手術其實是透過不同的技術將過長的包皮切割至可以自行處理及護理的長度,而非將包皮完全翻開(令龜頭長期外露)。進行割包皮手術後依然會有適量的包皮保護龜頭,在清潔或勃起時包皮可以更容易翻開,清潔嘅時候可以清潔得徹底啲,冇咁容易發炎。不過有冇需要割都係要問醫生,一般嚟講,如果無法顯露成個龜頭、曾經陰莖有發炎或者係包莖,咁先至需要做手術。

至於清潔龜頭方面,其實係唔需要用鹼液嘅,用溫水清洗龜頭同尿道口嘅位置就OK,因為鹼液裏面有唔少嘅化學劑,有機會刺激到尿道,破壞入面嘅生態環境,沖唔乾淨嘅話亦都會增加發炎嘅機會。一開頭返唔到成個包皮落嚟係唔緊要嘅,可以慢慢嘗試令到包皮熟習被翻開嘅感覺先,循序漸進咁清潔就可以㗎啦!

至於包皮屎,通常都係啡黃色,老泥咁樣嘅質地,因為唔肯定你黃色嘅分泌物係咪發炎嘅症狀,所以如果擔心嘅話建議去睇醫生。你都可以留意一下陰莖有冇痕癢灼痛嘅感覺,如果有嘅話,好大機會係陰莖發炎,咁就要盡快睇醫生啦!

至於性病主要以血液、精液、陰道分泌或其他體液作傳播媒介,一般經性接觸 (包括口交、肛交、陰道性交) 傳染。因為你從來都冇發生過性行為,除非你有同其他人共用針筒嘅習慣,如果唔係嘅話感染性病嘅機率係近乎零嘅,唔需要擔心。

但我諗返起,好耐之前曾經去街啲廁所,條J唔小心hi到廁板,計返時間好似就係差唔多時間之後有嘢,會唔會因為咁唔小心奶嘢?
佢唔係老泥咁,佢係液體咁,不過係黃色痴痴地咁…

糞便,尿液,同口水係唔會傳染性病嘅,只有高風險嘅體液,例如精液同埋血液,先至會傳染性病。所以掂到廁板傳染性病嘅機率係非常低嘅,需要擔心。

另外,關於黃色分泌物嗰方面,比較大可能係發炎,導致流出膿液,建議你盡快睇醫生。

呢啲係咪普通私家診所或者公立醫院睇醫生就得?定係要睇專科…

一般尿道發炎嘅話,普通私家診所已經可以開到消炎藥同抗生素俾你,所以係唔需要特登睇專科嘅。不過當然,實際嘅情況都要交俾醫生判斷,所以唔能夠排除有轉介同埋複診嘅需要~

1個讚