早幾日同男朋友有親密行為 佢有用手指插入我陰道 想知道如果佢有唔小心掂到自己pre cum再放入嚟懷孕機會大唔大？呢幾日都覺得個肚有啲谷 但係早個零星期先嚟完period應該唔係pms
自己都成日好擔心意外懷孕 知道自己都未ready有實質性行為 但係長久嚟講呢個好似都唔係一個太健康嘅心態。。。其實有冇專業人士例如性治療師可以喺呢方面幫到我？
唔該晒你哋
Hello
呢個情況就要視乎男朋友嘅手指掂到pre-cum之後幾耐插入你嘅陰道，如果係即時插入嘅話，就有比較低嘅意外懷孕風險。因為精子需要精液嘅保護先能夠生存，但當佢地掂到一啲物件，例如手指，床單，底褲，就會加速死亡。但其實pre-cum只係含有少量精子，所以呢個情況之下唔需要太擔心意外懷孕嘅機會。
見到你都成日有呢一個憂慮，但因為性行為都係兩個人嘅事，你會唔會想同男朋友就住呢方面去傾吓？搵出一個大家都同意同埋有共識嘅避孕方法，其實除咗安全套之外，仲有避孕藥，避孕針，避孕貼等等嘅安全措施，如果大家都同意嘅話，就可以避免你經常擔心嘅問題，大家又可以更享受性行為～
咁係咪即使近排卵期嘅時候掂到precum再放入陰道 導致懷孕嘅機會都低？咁如果係精液嘅話機會會大好多？定係性器官有直接接觸先會比較危險？
其實都不斷有同男朋友溝通 但焦慮嘅程度係連有性接觸都怕會導致懷孕 亦都知道避孕方法唔係100%成功 所以想知道睇性治療師會唔會幫到我？
好彩有你地呢個渠道等我可以放低我嘅心事感謝
Hello~其實性器官有直接接觸嘅話，懷孕嘅機率就較高，喺其他情況下間接接觸政治嘅話，懷孕嘅風險都係較細嘅。不過呢邊都會建議你無論進行任何形式嘅性行為/性接觸，都要全程正確咁使用安全措施。因為只有使用安全措施，先至可以係最大程度上保障自己同埋伴侶嘅安全。
見到你都非常緊張同焦慮，明白意外懷孕係會有啲措手不及嘅，不過建議你可以試吓諗吓如果最壞嘅情況發生咗會點，周圍嘅人會係咩反應，同埋點樣可以解決呢個問題。你可以諗清楚自己驚嘅究竟係乜嘢，跟住再同男朋友去傾呢個問題，例如如果真係有咗嘅話，雙方點樣一齊去面對。因為你唔係性功能障礙或者性冷淡，所以其實如果真係想見嘅話，見一般嘅輔導員同社工就能夠解決你嘅憂慮，唔一定需要搵性治療師（始終喺香港見治療師好貴
）。不過當然如果真係有需要嘅話都可以搵性治療師嘅～