我係男仔
今日一時好奇係網上約咗一個性工作者進行服務
佢幫我口交時原本有戴安全套，但因為當時未完全勃起，加上有啲敏感所以射咗，佢都有繼續一陣，然後安全套應該鬆咗佢都有繼續十令秒
其餘冇做任何嘢，我之前亦從未發生過性行為
好驚會因為咁而感染不同性病….
洗唔洗即刻去做檢查？
Hello~首先性病係屬於傳染病，不分年齡、性別、種族，一般透過性接觸，不論係性交、肛交、口交或生殖器之間皮膚接觸，就有機會經由血液、精液或其他體液感染性病。而性病一般可以分為細菌型性病，或者係病毒型性病。前者大多數都可以完全根治，而後者大多數未有藥物可以完全根治，但可以控制病情，例如愛滋病，性病疣（椰菜花）。至於傳播途徑，除咗上述提及到嘅，性病主要以血液、精液、陰道分泌或其他體液作傳播媒介。性病一般經性接觸 (包括口交、肛交、陰道性交) 傳染。有啲性病能夠透過皮膚傳染，例如椰菜花等，所以你冇帶安全套口交的確係會增加感染性病嘅風險。如果對方幫你口交嘅時候，佢嘅口腔有流緊血嘅傷口，咁就有較高嘅風險傳染性病。雖然無套口交傳染性病嘅風險，比起冇套進行插入式性行為細，但風險依然存在。
要留意嘅係感染性病之後會有一段時間嘅潛伏期，係呢段時間裏面病毒或者病菌潛伏喺體內唔會有任何病徵。而即使你已經有病徵都好，都需要過一段空窗期，等病毒嘅數量累積多啲，先至可以透過唔同嘅方法檢驗出病毒/病菌。以下就係一啲常見性病嘅潛伏期：
生殖器疱疹（疱疹二型）：約2-5天
淋病：約1-14天
滴蟲：約4-20天
衣原體感染：約7-21天
梅毒：約9-90天
性病疣（椰菜花）：約 1-8個月，平均為3個月
以上嘅時間都係一個平均數值，有好多人過咗呢段時間都未出現病徵，其實都係好正常嘅。除咗要睇你當時接觸到嘅病毒量，仲要睇你本身身體嘅狀況健唔健康。
性病比較特別，佢有一個叫空窗期嘅時期，就係感染病毒後，體內嘅病毒量未能被快速測試檢驗到嘅果段時間。一般坊間一啲免費嘅性病快速測試都需要大概係3個月左右嘅時間，身體嘅病毒量先至可以上升到可以檢查到嘅水平。係空窗期期間，雖然檢驗唔到，但係都可以傳染俾其他人嘅。而且愛滋病嘅潛伏期就半年到10年都有，所以感染咗愛滋病之後未必真係會立即發病嘅。
只要你係進行過一次唔安全嘅性接觸之後大概3個月，做一次全面嘅性病檢查，其實已經可以檢查到全部嘅性病。
另外，如果係空窗期內再有一個高風險嘅性接觸，其實就要重新開始計算三個月，當你去檢查嘅時候，其實就只能夠反應三個月之前嘅性接觸有無令你感染性病。睇返你嘅情況，你只係口交，其實感染到愛滋病嘅風險都係非常低嘅。
如果真係感染咗性病嘅話，就一定要積極進行治療。因為如果性病得到治療嘅話，致命嘅風險都係好低嘅。而當病毒或者病菌嘅數目受藥物控制，減低到冇辦法被檢測到嘅時候，咁即使你同其他人進行性行為，性病都唔會傳染俾其他人（Undetectable = Untransmittable)。即係話你係可以擁有正常嘅性行為同埋健康嘅仔女，所以及早發現及早治療最重要，同埋記住要定期檢測～
如果你未決定去邊度驗血，建議你可以選擇去以下機構做免費嘅性病測試。
政府社會衛生科服務診所：各類型性病檢查（較全面，能即時知結果及比藥）
關懷愛滋：25歲或以下青少年、男男性接觸者－愛滋滋病病毒／梅毒／淋病／衣原體／丙型肝炎
香港愛滋病基金會：愛滋滋病病毒／梅毒／丙型肝炎
再思社區健康組織 (C.H.O.I.C.E.) ：愛滋病病毒／梅毒
暫時可以先留意自己身體有無出現明顯病徵。如果已經出現下體痕癢、小便刺痛、分泌物異常、下體生粒粒等病徵時，就可以先及早求醫。不過如果未有出現明顯病徵的話，都建議考慮三個月（三個月已經過左大部分性病嘅空窗期）後，再一次過去做一個全面嘅性病檢測，會比較準確🫶🏻