Hello 你好呀
我喺六月中（6/11）嘅時候有發生過一次唔安全嘅性行為 但喺之後嘅兩個鐘內食事後藥
過左四日左右有出血 出左4日
而中間嘅時間都有試過用驗孕 驗左幾次都係negative
跟住去到8月15先嚟M 佢嘅出血量同嚟M差唔多
但係我之前嚟m係嚟7至9日左右 但係今次只係嚟左5日
想問下係唔係正常架？ 同埋係咪已經可以排除左懷孕嘅可能性？
Hello你好啊
見到喺不安全性行為後兩個鐘內食事後藥，成功率係好高嘅
再加上你已經進行驗孕，喺性行為11日後驗孕，就已經有準確嘅結果㗎喇，而月經就代表月經出現前發生嘅性行為係冇導致懷孕嘅，所以唔需要擔心
因為事後藥係好高劑量嘅人造荷爾蒙，主要透過1）抑制排卵、2）改變子宮環境而達至避孕嘅功效，你喺食事後藥後嘅岀血係撤退性出血，都可以當係一次月經，食完事後藥後嘅岀血係因為子宮內膜剝落所導致嘅，即使有排卵，都可以令受精卵跟住內膜一齊排出，避免懷孕。事後丸會擾亂你之後1-3個月嘅月經周期，所以會岀現你嘅情況，再加上月經一般係2至7日，而喺月經週期內，子宮內膜係逐漸增厚，喺中間已經脫落過一次嘅話，咁今次岀血日子變少都係正常嘅，所以今次月經岀血日子都係無問題嘅
係到想分享下，事後藥唔係一個可以長期使用嘅避孕方法，一個月經週期只可以食一次，一年唔可以食多過三次。假如今次月經週期內已經食過事後藥，咁剩餘嘅日子就要用更加高效嘅避孕方法喇
Hello 多謝你答我嘅問題呀
正如我之前咁講我8月中嚟左m 嚟左5日
但係我而家仲未嚟m 嗰肚又脹脹地
唔知會唔會係心理作用 驚8月中嗰次係嚟假m
想問下照陰超嘅準確率係幾高 我係8月頭嘅時有照過一次 醫生就話冇照到 會唔會有機會照唔到
自從我6月嘅嗰一次之後再冇發生過任何性行為
Hello~你所講嘅假月經應該係指著床性出血。着床性出血一般只會維持一至兩日，並且出血量唔會多個一塊護墊所承受嘅份量。見到你話8月中嚟過一次月經，並持續左五日，咁其實可以好肯定嗰次係真嘅月經，並且你係冇懷孕嘅。加上照陰超嘅準確度係好高嘅，而你6月後再冇發生過性行為，如果真係有咗，應該已經見肚，同埋會出現懷孕初期症狀，所以可以好肯定係冇懷孕，係唔需要再照多次嘅。
至於月經延遲嘅原因有好多，體重過輕，壓力大，生活唔規律…都會導致月經遲嚟。除非月經比起平時遲咗三個星期以上都未嚟，先至需要睇醫生，等醫生考慮會唔會處方荷爾蒙藥物畀你去催經。現階段可以再等下先～