上一次月經係8月10號至16號，頭三日多血之後都正常，但係25-29號有啲血絲白帶同啫喱狀嘅分泌物，當嗰段時間係排卵期啦，但係9月2號到而家有好少好少血，又或者係啡色嘅分泌物同埋血絲，咁我而家算唔算係嚟緊月經？定仲係排卵期？
Hello 相信你嘅情況應該都係要嚟月經。因為有時係正式嚟月經之前，都會有啲月經前分泌物，例如你提到嘅啡色分泌物或者血絲等等。你可以留意返你之前一直以來嘅月經周期，再計返規律，睇吓係咪差唔多時間到，咁樣都有助了解返相關嘅情況。另外即使上個月有出現咁嘅情況，而今個月唔同咗係好正常，因為月經周期本身就係一個好複雜嘅系統，亦都受着好多因素影響，所以有轉變都好正常。
謝謝 因為我都只係試過喺月經來前一日先至有呢啲咁樣嘅分泌物 但係依家都係第四日有呢啲分泌物
上一次係周期第35日先嚟 而今次係周期第27日有呢啲分泌物幾日係咪正常？
Hello~正如同事所講，月經周期係一個複雜嘅系統，而你依家出現嘅分泌物都屬於正常狀況，所以唔需要太擔心
除非分泌物出現異味，或者顔色變成黃色、綠色，甚至有豆腐渣質地嘅狀況出現，咁就需要留意係咪有發炎/感染嘅狀況出現。
而月經周期喺23-35日内都喺可接受嘅範圍，並且會受唔同因素(例如壓力、飲食、服藥等狀況)而影響周期嘅長短，所以月經前分泌物喺第27日出現都係可接受嘅情況嚟嘅
想問搵剩係得7號同8號係比較正常嘅經血 跟住持續到而家都係啡色嘅分泌物係唔係正常？
即係而家已經成兩個禮拜有呢啲分泌物 仲算唔算係月經
一般嚟講，月經係唔會持續咁耐嘅。你嘅情況有機會係排卵期同月經重疊咗，所以先導致啡色嘅分泌物持續咁耐。不過呢種情況係好少見嘅，加上你話剩係得兩日有正常嘅出血，所以都會建議你搵時間去做個詳細嘅婦科檢查，保障返自己嘅健康。
我睇返係月7號至到10號都係比較正常，但係2號至6號同埋11號到而家都係啡色分泌物都係因為排卵期？
仲有我喺八月25-29號都係有一啲啫喱狀嘅分泌物 所以唔知邊段時間先係
仲有會唔會因為作息時間會搞到咁樣？定係會真係有病先至會咁樣嘅情況
如果正常嘅出血喺有4日嘅話，咁就喺正常嘅月經範圍內，相對而言可以放心啲。至於啡色嘅分泌物，除咗排卵期之外，月經前後都有機會出現嘅，不過通常唔會持續兩個星期咁耐，所以可能代表身體出現內分泌失調嘅情況，要多啲注意作息同生活習慣
。
因為月經同分泌物係受荷爾蒙水平影響嘅，飲食，運動，睡眠習慣，生活壓力，生病等通通都會有影響。如果身體質素較差的話，就有機會出現經血唔暢順，積血嘅情況
。
睇開中醫問醫師話應該到係排卵期嗰啲，但係唔知係唔係內分泌失調所致
另外都想問吓如果係細菌感染嘅話佢會唔會之後會好返 定係都係要睇吓醫生？
如果想知係咪內分泌失調嘅話都真係需要睇醫生先知道。至於有關發炎方面，一般完成整個抗生素療程就會康復。