我朋友（下稱A，20歲）幾日前夜晚因為唔見咗，咁我同其他人因為擔心A有咩事就去搵佢。
之後收到一啲消息就話佢電話又唔聽，message又唔覆，咁就去咗A嘅工作室，同埋A去開hea嘅地方搵佢，最後就喺海旁搵到A，但A當時情緒太過激動就打算跳海，好彩經過朋友嘅調解下A就落返嚟，之後就送院。
（其後仲收到消息話，當過咗12點之後，佢電話就會自動send message俾我哋，係佢寫嘅遺書）
去咗醫院等待左一整晚，A終於冷靜翻落嚟，但係未肯見人住，之後去咗精神科嗰度留院觀察，醫生初步診斷有嚴重抑鬱症，係呢個時候都未知A想自殺嘅原因。
第二日好慶幸A俾我哋去探佢，係溝通下我哋都有意無意咁樣滲透「會一直陪伴佢」嘅訊息，希望佢諗嘢可以正面啲，過程中都有講有笑，好似平常傾偈咁，都冇逼佢講當晚發生嘅事，同埋點解要做啲件事嘅原因，希望A可以順其自然想講就講。
隔咗一陣，A就同我哋講咗，原來佢同佢之前嘅SP有咗BB，但A隱瞞咗SP就自己去咗做人工流產，冇同任何人講。
然後嗰晚情緒爆發就發生咗想跳海呢件事。
探病嗰時A表面上有講有笑，但係我感覺到其實佢仲有少少壓抑住，佢都有講佢自己有啲後悔，佢努力改變緊，而家仍然留院觀察中，未知幾時可以出嚟。
A係一個唔鐘意同人講自己事嘅人，特別係大事，成日都會收收埋埋，但佢係一個好有抱負嘅人，有夢想有理想，真係唔知道佢承受左幾多，最後先行到呢一步，我唔想失去佢，佢係我人生中係一個好重要嘅人，我想協助佢一齊走出嚟，我知道要用時間慢慢去改變，令佢接受自己，而最後都要放手等佢自己走出嚟。
我想知道我除咗陪伴、傾偈之外，仲可以做咩？
傾偈過程中，我應該要講咩？
因為我唔係好識點樣安慰同俾意見