想問男女都成年，
剛發現意外懷孕，想落胎，
家計會會唔會俾男朋友陪同成個process 㗎？
同埋時間大概要幾耐到（由第一次去家計會）先完成到成個中止懷孕嘅process？
Hello你好啊
因為都有好多求診人士，所以為咗保障大家嘅私隱，喺成個過程中，都唔可以有其他人一齊嘅，加上其實由求診面談到即時做檢查嘅過程係好快嘅。雖然唔可以入去陪住另一半，但依個始終係重大嘅決定，所以你都可以喺岀面等待、陪伴。
喺家計會進行終止懷孕的話一般都會需要進行至少3次到診：
第一次：由醫護人員了解身體狀況、檢查身體、評估懷孕週數、講解可做的選擇和講解避孕方法，會見輔導員進行情緒支援、了解受助者意願同選擇。
第二次：受助者做出決定，進行轉介／終止懷孕醫療程序，輔導員提供心理輔導
第三次：術後覆診
按照受助者情況，覆診次數都會有所不同。收費方面大概需要合共$4400-6100，排期時間需要2－3星期。不過，因為求助者人數眾多，排期時間有機會要更加耐都唔一定。而如果受助者身體情況唔適合喺家計會診所進行手術，家計會會轉介去公立或私家醫院。
關於喺家計會進行終止懷孕嘅詳情同埋收費，可以留意： 終止懷孕 - 香港家庭計劃指導會
根據「香港合法墮胎條例」，申請終止懷孕嘅當事人要經兩名醫生證明其正在懷孕，而且繼續懷孕對孕婦生命構成嘅生理或心理損害較終止懷孕大 (參考資料: https://www.famplan.org.hk/zh/health-info/unplanned-pregnancy 6) 。
家計會提供藥物及手術終止懷孕，假如就診者流產當天的胎齡超過10週，就唔可以喺家計會終止懷孕，所以我地都建議可以盡快預約，如果另一半係26歲以下，就需要懷孕女士打電話去青少年保健中心進行預約。
-灣仔青少年保健中心預約電話：25754799
-旺角青少年保健中心預約電話：27704994
-葵芳青少年保健中心預約電話：24432773
至於需時幾耐，都需要睇當時情況。約期後，家計會職員會先初步評估求診者，合適人士會再轉介醫生，作進一步評估及預約手術期，如果一齊順利，大概會喺一個月內完成成個流程。喺確認懷孕後，建議盡早預約，可以喺胎齡10週以下進行程序，可以選擇風險較低嘅藥物墮胎。進行程序當日，需要換上手術袍，服食藥物，亦都會一直監察住你女朋友嘅身體狀況，會岀血，可能會有發冷、想嘔等唔舒服嘅感受，一般來講假如朝早去到嘅話，通常夜晚就可以出返嚟，如果比較晏去到或者可能情況較複雜就可能要留醫一晚。