你地好。
我有按摩習慣, 朋友介紹之下上月8月25日去左一間邪骨店, 好奇下第一次試左Nuru按摩。在我沒有要求的情況下, 技師突然幫我口交, 我立即推開左佢。我有啲驚, 即刻沖涼就走。
9月頭開始有感冒同喉嚨痛, 兩隻手臀成日都好似出左啲紅班,紅斑過一陣又自己散/無咁紅。 我衣家好擔心自己染上性病, 已經預約左下星期去個全餐檢查(day22)。但最近每日都好擔心, 食唔安坐唔落,無時無刻都上網睇相關資料。有無人可以傾下。唔該。
Hello 你好啊～
首先，性病主要嘅傳播途徑透過體液，例如精液、腸液、尿道球腺分泌（Pre-cum）、陰道分泌、血液，接觸過身體比較薄嘅黏膜組織，例如肛門、口腔、陰道，或者傷口就有機會傳播到病毒。
回應番無套口交嘅性病風險，除非佢口腔裡面有流緊血嘅傷口或者已經有明顯病徵，同時你陰部都有流緊血嘅傷口，否則口交傳染性病嘅風險都好低。
不過針對一啲透過皮膚接觸可以傳播嘅性病，例如椰菜花、皰疹等，有可能喺口交過程中唔小心整穿咗，就有感染性病嘅風險。
總括而言呢個都係一個相對地低風險嘅性接觸，明白好擔心會感染性病，不過依加醫學進步，唔少性病可以痊癒，其他亦可以控制到病情，令你唔受症狀影響，亦都唔會有感染他人嘅能力。
知道你已經預約咗性病測試，咁樣係好好㗎，因為進行測試係令個情況導向緊去一個可以控制同改善嘅情況，如果冇感染，咁就安心晒；如果有，亦可以盡快展開治療，令到性病得以痊癒或受控，就唔會再影響到你嘅生活喇。
要記得，感染到性病唔係世界末日，而性病亦都唔係絕症，希望咁樣你會感覺安心一啲啦～
多謝你回覆
但仲係好擔心會有愛滋。我上網睇左好多資料，但都無辦法確定究竟我會唔會中招。我上星期有喉嚨痛，大便去爛屎，發熱（但無發燒），軀幹/心口/頸/手掌都無紅，係得手臀紅左但唔會痕（衣家無之前咁紅）。咁係咪中既機會好細。真係好擔心，唔想一世都咩住哩個病。好後悔聽朋友講去試。求開解。
明白你會有好多擔心，所以令你不斷上網搵資料去睇，但其實越睇越多反而會更加焦慮不安啊。所以可以嘗試做其他嘢令自己注意力分散。因為到嘅呢一種焦慮不安持續嘅話，會令情緒持續低落，又或者精神健康出現問題。而你所提及嘅一啲身體異常情況，其實有好多時都係因為心理因素影響，當你不斷去諗嘅時候，都有機會令平時身體唔出現嘅情況，會因為精神壓力而出現。另外有好多人患上性病都未必有病徵，所以唔可以憑呢啲身體異常情況去判斷自己有冇性病呀，最重要都係等醫生幫你做一個全面嘅檢查，咁見到科學嘅數字都會安心啲～