早前試過ptgf性交，諗住做2次
第一次時間大約10分鐘
做第2次前就休息左一陣
再做嘅時候有勃起，但係點做都無射精嘅意欲
大約15分鐘就停左
咁樣嘅情況有無問題呢？
Hello~ 其實射精之後幾耐可以再射第二次，呢個時間嘅長度係因人而異嘅，甚至每人每次所需嘅時間都會有所唔同。射精之後陰莖會需要一段時間恢復對於刺激嘅條件反射反應，所以喺恢復期間唔能夠因為受到刺激而勃起或射精，可能你都會聽過有啲人話呢段時間係「不應期」或者「聖人模式」。而20－30分鐘係大概恢復嘅平均時間，但未必代表個個都會係咁，有啲人需要長啲時間（可能一個鐘左右）去俾陰莖休息，而有啲人需要嘅時間相對短，可能15分鐘內陰莖已經可以再次充血勃起，不過因為比身體再次製造精子嘅時間較短，所以第二次射精嘅量會較少，或者射唔出，而呢啲情況都係正常嘅。至於影響呢個時間長短嘅因素有年齡、當日嘅身體狀況、環境、壓力、刺激感、休息夠唔夠、夠唔夠放鬆等等。而只要能夠正常勃起，無論呢段休息嘅時間有幾長，都唔關勃起功能事嘅，唔需要擔心如果「不應期」相對比較長係咪唔正常或者陰莖功能有問題。 
另外都想比你知道，令人愉悅嘅性行為未必係取決於射精嘅次數，反而更加緊要嘅係同伴侶嘅溝通，睇下點樣可以令大家都覺得舒服同埋享受。「不應期」期間雖然唔能夠進行插入式性行為住，但係唔少人會用呢段時間傾下計，進行親吻或者愛撫，或者純粹攬住休息，都不失情趣同埋親密感㗎。 
1個讚