自問自己冇邊度係好差，但唯一個樣就好樣衰
好似自己個鼻特別大咁 好驚除口罩嘅人見到自己戴咗口罩同埋除口罩嘅分別好大俾佢哋笑 雖然佢哋應該都見過我冇口罩嘅樣 但係都仍然好驚比佢哋咁樣望住
之後就試吓學化妝 但係總覺得自己化完都係好樣衰 之前都有人cap我嘅圖笑我好樣衰搞到我而家更加冇自信 都唔知點樣做先可以令自己冇咁憂慮
Hello~其實真係好明白容貌焦慮嘅感覺
，好似無論嗰日扮得幾靚都好，人哋都係會望住我哋唔完美嘅器官，暗地裏對我哋指指點點，呢種感覺超級唔好受。其實有邊個唔想自己生得靚啲，素顏都可以係靚女wor，有好多嘢我哋都只可以逆來順受，如果想強行改變嘅話好似要付出好大代價先至做到，自己又冇足夠嘅勇氣去對抗別人嘅眼光⋯⋯
我呢度唔會叫你唔好理人哋點睇，因為呢樣嘢唔係好多人可以做到，始終大多數人都係會在意自己係其他人心目中嘅形象。「想人哋鍾意自己」呢個唔係我哋嘅問題，而係我哋比自己嘅一個挑戰同目標！我哋可以通過化妝來調整眼耳口鼻嘅比例，當然呢樣嘢係需要練習嘅，同埋需要花時間來搵出最適合自己嘅妝容，跟住YouTuber化妝唔一定可以有同一個效果㗎！化妝同着衫一樣，要記住佢哋都係輔助，我哋係通過呢啲外在嘅方法去突顯自己嘅優點，創造屬於自己嘅形象同特色。如果一味隱藏缺點嘅話，其實係冇解決到個問題㗎！舉個例子，如果覺得自己個鼻好大，可以試吓通過化一個eye catching 嘅眼妝去吸引人哋嘅目光，或者通過衣着去營造可愛嘅氛圍，令到個鼻同衣着配合，變成你最大嘅特色🫶🏻。
要接受自己嘅一切係好困難嘅，你要我而家素顏唔戴口罩出街我諗我都做唔到
。不過我好享受每日化妝襯衫出街嘅過程，就算我唔係一個標準嘅靚女，但係我每日都進步緊。當然，可能俾咗好多心機化妝都會有人話我樣衰，化妝化得唔好等等，但我唔會覺得呢個係我自身嘅問題，而係我下次化妝化得好啲就可以解決到嘅！如果對方批評完係有比到解決方法嘅，咁我哋咪試吓去改變囉～但係如果對方純粹亂噏，通過詆毁我哋去獲得快樂嘅話，咁呢啲人嘅意見我哋都冇必要重視啦～你話啱唔啱？
多謝你🫶🏻
1個讚