我呢三個月嘅月經都好唔穩定。
第一個月同第二個月都係第20-21日就來月經（以往都係28日左右先有），但係血量同持續日子都同平時一樣，所以冇去睇到醫生。
第三個月就第30日來月經，個日子同以往差唔多，但係血量少好多，同埋去到第4日已經差唔多冇血，同平時來月經個陣差好遠。因為我平時係血量好多+會嚟最少5日都仲有血。
我同男朋友一直冇做到最後一步即性器官插入的性行為，性行為只有指交同埋隔住內褲去做性行為，唔知咁樣再加上第三個月咁奇怪嘅經期，會唔會有懷孕風險？想問下咁樣洗唔洗去睇婦科醫生？
再補充一下：平時day2瞓醒係多血到成張M巾都差唔多滿，而今次（第三個月）day2瞓醒只係平時一半
Hello~其實月經周期係受好多因素影響嘅，所以唔係話上個月幾多號嚟，今個月就會喺同一日喺。一般來講，月經早或遲1-7日都係正常嘅。而月經延遲嘅原因有好多，體重過輕，壓力大，生活唔規律，病咗…都會導致月經遲嚟。除非月經比起平時遲咗三個星期以上都未嚟，先至需要睇醫生，等醫生考慮會唔會處方荷爾蒙藥物畀你去催經。至於血量方面，同月經周期一樣都係受好多因素影響嘅，所以係唔需要太concern㗎！
另外性器官冇直接接觸嘅話懷孕機率係近乎零嘅，所以唔太需要擔心懷孕，亦都唔使特登睇婦科醫生。
唔該晒你，想再問下會唔會有機會係懷孕既假性月經架？見個血量都比以往一直以來少好多
指交自己擔心既係唔知會唔會男方掂到自己性器但唔記得左就指交，不過每次指交時長都好短，唔夠一分鐘
你講嘅假性月經應該係指著床性出血，呢種出血會發生喺受精卵着床嘅頭10日，不過由於出血量比較少，一塊護墊就裝得晒，同埋只會維持1-2日，見到你嘅出血量都多嘅，所以可以排除呢種可能性。
另外，精子暴露喺空氣中通常幾分鐘內就會死亡，而且精子需要有精液嘅保護先可以生存，所以當接觸到皮膚、衣物纖維、紙巾等表面嘅時候，精液會被吸收同揮發，進一步減低精子嘅存活率，所以就算男方掂到自己性器再指交，導致懷孕嘅機率都係好低嘅，唔需要擔心🫶🏻。