今朝早我啱啱做完，未夠72小時。全程都有戴套。但係拎返條嘢出嚟嗰陣我feel到，有一滴精滴滴咗喺我陰唇出面，我有去立即沖洗。同埋諗返起做嗰陣，有掂到佢啲前列腺液，之後又摸返自己陰唇，咁樣大唔大機會會中招？係咪應該食定事後？同埋想問吓知唔知邊間藥房可以買到？
你好，根據你既情況係可能會有意外懷孕嘅機會，但機會係比較微。因為性器官有直接接觸，就會有意外懷孕嘅機會。而男性性興奮嘅時候會分泌尿道球腺液，當中含有少量精子，但因為只係掂到陰唇，而且你哋有即時清洗，相比無使用安全套嘅情況下插入陰道，你哋嘅情況懷孕機會就較低。
但如果你地真係想完全排除風險，係可以選擇服食事後丸。只要喺性行為進行之後，72小時內，或者120小時服用由醫生處方嘅事後丸，服用藥物2小時內如果冇出現嚴重嘅副作用（例如嘔吐或者肚痾，令身體有機會排出藥丸）嘅話，其實事後藥都會喺身體發揮作用。但記住一定要去睇醫生由醫生處方，千祈唔好去藥房就咁買，因為我地係唔能夠確保藥房俾既係咪真正既事後藥。
如果你地覺得去診所睇醫生費用較貴，都可以選擇去睇家計會等機構。
關於家計會緊急避孕服務同收費，可以參考：青少年保健 - 香港家庭計劃指導會
之後你亦可考慮埋自行驗孕，自行驗孕其實可以喺性行為後11日進行，因為驗孕棒係透過檢測尿液中嘅hCG (人絨毛膜促性腺激素)含量，呢個激素會係受精卵著床後開始大量分泌，而一般受精著床呢個過程需要6-9日，所以係性行為後7日使用驗孕棒的話會有初步嘅結果，而係11日後或者預計經期嘅日子驗孕結果會更加準確。希望幫到你。