我月經第三日，男友陰莖係我陰蒂及外陰磨擦後射精，請問會懷孕嗎…？
Hello 咁嘅情況都係會有懷孕風險。
首先，想用安全期去計懷孕風險係唔可靠嘅，因為現實中係好難準確計算身體幾時排卵，有時會比預期嘅早咗，都可能會遲咗。如果你地冇做到任何安全措施而發生性行為，無論係月經嘅任何一日發生都好，都可能會有懷孕風險嘅。
正常情況下，如果精子進入陰道，就有懷孕風險，所以如果有插入式性行為而又冇做安全措施嘅話，係最高風險嘅。
雖然你男友只係喺外陰磨擦，冇插入式性行為，未必係最高風險，但陰莖性興奮時都會分泌尿道球腺液，當中有機會會有精子，而磨擦過程都唔可以完全排除會唔會有分泌物接觸到陰道，所以都唔可以100%排除懷孕風險。
如果真係好擔心嘅話，都可以考慮喺性行為之後72小時，或者120小時內食事後丸。由於事後丸係香港都係醫生處方藥物，所以都可以去睇醫生，例如去家計會或者家庭醫生，並同醫生講解返情況，再由醫生判斷是否需要同合適食事後丸。
你亦可以買驗孕棒係性行為之後7-11日自行驗孕，7日後驗就有初步結果，11日後就有準確結果。
希望幫到你