之前一直有食開事前丸，後來因爲無時間去家計會買，所以停左一個月。果一個月同男朋友用套，點知有一次穿左，所以去左藥房買事後（安立婷）…過左一個星期左右就來M，拿拿聲開始食翻，我食開優悅，都係跟家計會instruction，來M第五日開始食。之後有一次同男朋友unsafe sex, 因爲我記錯左已經食第七日，點知翻到屋企先發現原來sex當日夜晚先食第七粒，我有打電話去家計會問，佢地都話未食夠七日無避孕效果，咁我打算book食事後，因爲距離上次食事後都只有兩個星期，本來打算見家計會醫生果陣講埋，點知佢地一係就話無醫生，要我去另一間問，打去另一間啲時間又撞返工，我又心急，就唯有又衝去藥房買左安立婷食。都有keep住食優悅。
之後又隔左大概一個禮拜，又來M，可能都因爲我食左事後丸，所以我就跟翻優悅自己個instruction, 重新開左一包，計第一日來M開始食。今次就無打電話去家計會問。但今次過左成個星期，今日已經係第七日，啲M都好似未識停咁。我M量未食優悅之前好多，係血崩咁款，但食左優悅之後個量就正正常常，同埋通常去到第六日已經得翻幾滴，但今次每日量都好似好similar, 今日第七日都無覺得少左/ 就快完。請問我應該點部署？係咪應該停服優悅先？
Hello, 欣賞你發現安全套穿左同事前藥食唔夠7日，有即時服用事後藥減低導致懷孕既機會。不過事後丸喺香港係屬醫生處方藥物 ，係唔能夠於藥房／個人用品護理店購買得到。一般可以選擇去家計會／母嬰健康院／普通科門診／婦科診所／急症室睇醫生攞事後丸，如果買事後丸時，並非由以上地方嘅醫生處方的話，咁藥物嘅成效、質素及來源就會比較令人擔心。建議儘快攞番之前買藥的包裝盒（如有），去番家計會／其他婦科診所睇醫生，了解一下之前服用過嘅藥物係咩，會否對身體造成影響。同時，睇睇有無需要服用番來源及質素可靠嘅事後丸，減低懷孕嘅風險。而係一個月內連續服用2次事後藥，會影響月經週期，對身體都有一定嘅負擔，而且係同一週期食2次避孕功效亦會受到影響，就好似你而家出血嘅情況打亂曬咁，所以都建議你先停藥。
食完事後藥之後出血稱為撤退性出血，出血係因為事後丸係通過抑制排卵，同埋改變子宮內膜環境嚟阻止懷孕。而經血量會受好多因素影響，常見嘅就係生活作息，飲食習慣，情緒壓力等。如果好擔心嘅話，可以去睇醫生檢查身體狀況，根據醫生指引是否繼續服用。
根據你的情況你因為安全套穿左同忘記食到第幾日，建議可以咁做避免再發生而要食事後藥。
安全套穿左原因，主要係因為（1）戴嘅時候可能未有確保完全按實安全套上嘅儲精囊，令空氣有機會喺套入面，喺磨擦同埋擠壓嘅過程中就會令安全套穿左；（2）安全套嘅表面唔夠濕潤，磨擦力太強嘅時候，就會令安全套磨穿；（3）安全套正反面調轉左；（4）安全套尺寸唔合適；（5）安全套已經過左期。如果係（2）既原因建議使用潤滑劑，因為有助避免安全套因為表面乾燥、磨擦力過高，而導致破裂嘅情況發生嘅機會。
建議使用服藥記錄嘅app幫助自己記錄每日嘅服藥情況，避免再發生漏服/唔記得服藥情況。
Thanks for reply! 咁想請問如果停左藥，係咪正常會自己調整返好，等下次來M再開始食
冇錯啊，都會建議等嚟咗M之後先再開始食事前避孕藥。