啱啱分手 以為自己放得低但原來唔可以 佢冇block我但佢回收曬嘈交所send嘅訊息 唔係好明佢點諗…
分手之前嘅問題 就係佢生日活動叫曬朋友去 唯一冇叫我 有人問佢我會唔會去 佢竟然話我唔得閒 但我嗰陣完全唔知件事 佢話因為屋企人喺度我唔可以去 但我提分手嘅原因係佢完全冇尊重我 之後佢都肯分手 竟然仲話想我幫佢課金 我嗰陣好決絕咁分 但仲係好掛住佢 今日去返ig chatbox就發現佢回收曬分手之前講嘅嘢 佢係咪驚我唱佢驚到要咁做
好似所有嘢都係我錯咁
其實要處理啲乜嘢
都分咗手，佢回收晒之前講嘅嘢，咁又點
係咪有負面影響？所以要處理？
Hello你好啊
明白前度嘅行為令人感到好困惑，有種唔知對方想點嘅感覺
見到對方分手前嘅行為令你感覺到佢無尊重你，例如因為屋企人喺度，所以生日活動無叫到你參加，當其他人問起時，就話你唔得閒，其實係一段感情中，我地都會希望對方對自己誠實，如果對方有事暪住自己都會好難受，就例如喺你嘅情況中，相信令你最難受嘅唔係無得參加對方嘅生日活動，而係對方連問都無問過你，而你都意識到到依段關係對令你感覺到不被尊重，所以選擇分開，減少對方對自己造成嘅傷害。但係始終你都有喺依段感情中付出，所以就算分咗手，都會感到唔捨得、會掛住對方，其實係好正常咖，好難一分開就可以即刻完全放低前度，有啲感覺同回憶可能都仲係好深刻，係好正常嘅事。不過都唔需要因為咁而自責或者逼自己move on，因為雖然咁講好老土，但好多時感覺同回憶都係要靠時間沖淡~而對方係分開後更del咗分手之前講嘅嘢，令你唔知到底佢諗咩，好似將分手嘅責任推落你到，但我地都希望你明白絕對唔係嘅，分開唔係你嘅錯，依段關係令你感到不被尊重，分開時，對方仲想你幫佢課金，無尊重你嘅感受。
但係而家你哋已經分咗手，都想你明白，去諗到底對方諗咩呢個問題其實都未必對你哋嘅關係有咩幫助。雖然可能有啲困難，但係呢度都會建議你放多啲專注力喺自己身上面，做一啲自己感興趣嘅事情去放鬆心情，你亦都可以搵朋友傾訴同埋陪伴，或者去進行能夠發洩情緒嘅活動，例如聽音樂、行山、影多啲靚相等等