避孕針後內射

已經打左2次避孕針,但係好似打完之前間唔中陰道都會痛,會唔會係陰道炎?但我係打左避孕針後開始間中有無套性行為,陰道痛會唔會關無套性行為或者我事後沖洗陰道?另外其實打左避孕針仲需唔需要戴套同埋內射係咪都係應該避免?內射完其實正常係咪都應該盡快沖洗返出黎?

hello你好啊~

見到喺打完避孕針後出現陰道痛嘅情況,陰道痛唔係避孕針嘅副作用,所以可能由其他原因導致嘅。可以留意一下除咗陰道痛外,仲有無其他唔舒服,例如分泌物顏色、氣味唔同咗(魚腥味)、陰道壁痕癢,有灼燒感等等,陰道炎嘅病徵包括:

  • 白帶流量突然增加
  • 白帶轉為黃、綠色、帶臭,或帶血
  • 外陰痕癢、疼痛、紅腫
  • 小便時有灼痛的感覺

另外都有可能係念珠菌陰道炎,病徵包括:

  • 外陰痕癢、赤痛或紅腫
  • 下陰流出白色黏稠分泌物
  • 性交時感到疼痛。

所以都建議睇完醫生後,了解清楚身體狀況後,再發生性行為,保障番大家嘅安全~

發生性行為前,雙方都最好做好清潔,保持生殖器清潔,減低細菌感染嘅機會。發生性行為後,其實陰道會自己清潔嘅,所以會自行排出進入咗體內嘅精液,如果想嘅,可以簡單用乾淨、溫和嘅清水沖洗外陰,之後再用乾淨嘅毛巾或紙巾擦乾,不過記住唔好灌水啊,因為咁樣會影響左陰道嘅生態平衡,會好容易導致感染嘅。性行為後都建議沖涼同多飲水排尿,咁樣有助沖走外陰同尿道口嘅細菌。

最後想提醒下,經醫護人員評估後,注射避孕針固然有效避孕,但一個安全嘅性行為除咗避孕外,亦包括減低性病傳播嘅風險,而唯一有效同時避孕同減低性病傳播風險嘅就只有使用安全套,所以都可以考慮下想採用邊種合適自己嘅安全措施~

咁其實打左針後性行為仲需唔需要戴套,定其實避孕針已經有足夠避孕力?
如果想睇醫生係咪都可以去家計會睇?

係到想分享少少避孕針嘅原理先~

避孕針係通過注射人造荷爾蒙,抑制卵巢排卵、令子宮內膜產生變化,使受精卵難以著床;並增加子宮頸分泌物粘稠度,使精子難以穿過黏液進入子宮腔,有94-99%嘅避孕成功率。通常家計會會建議係月經週期頭7日內打針,原則上打完會立即有避孕效果。而如果你係其他診所注射,而並非係月經頭7日內注射,咁注射後14日內如果要發生性行為的話都要使用安全套,因為身體需要時間去建立藥效。

即係話如果你係月經週期頭7日內打針,當針藥效期屆滿時有依期接續注射,咁其實避孕成功率係高達94-99%嘅。

不過正如上面所講,避孕針只能夠做到避孕,唔能夠有效預防性疾病傳播,唯一有效同時避孕同減低性病傳播風險嘅就只有使用安全套,所以可以就住自己嘅身體狀況、需求而選擇適合你嘅安全措施~

如果你係26歲以下及未婚嘅話可以去家計會嘅青少年保健中心,而已婚/26歲以上嘅話就可以去佢地嘅診所。醫生評估服務診金: 青少年保健中心$150;家計會診所$220。不過留意返唔係每一間家計會診所都有提供婦女健康服務嘅,而無論係青少年保健中心/家計會診所嘅保健服務係必須預約嘅,你可以透過家計會嘅網上預約系統/致電該間保健中心/診所預約到診時間。有關家計會嘅健康服務詳情可以參閱以下網站: https://www.famplan.org.hk/zh/our-services/clinic-services/women-health/women-health-service/content 195