今日同男友第一次無套咁插左入去，平時都係用手或者口
佢成個完全放囇入去，插到好入，又係咁好大力咁頂，但係全程都冇射，事後有用清水加沐浴露洗過
我地大約都插咗四十五分鐘至一個鐘（冇計過，大約時間）中間有攞過出去嚟，但係之後又插返入去
我計過我插完嘅第二日就係排卵期，而家好後悔無套插左入去，又好驚會有咗，想問大家咁樣會唔會好大機會中
同埋除咗食事後丸嗰啲，有冇啲咩可以減低中嘅風險，例如我有上網搵過食咩可以減低中嘅風險
Hello~ 喺無使用安全措施嘅情況下發生性行為係會有懷孕嘅機會，加上你哋成個過程維持咗超過45分鐘，喺過程中分泌咗含有精子嘅尿道球腺液嘅機會非常高，一旦精子進入陰道，佢可以喺體內存活2、3日，一旦遇上排卵，懷孕期風險就更加高喇。
呢個時候會建議你採取緊急避孕措施，例如事後丸或者配戴銅性子宮環，兩者嘅避孕成效都係相當高嘅 (成功率達97-99%)，只要喺時限內服食／配戴，懷孕嘅機會係好低嘅～ 但係兩種方法都唔係所有人適用，所以建議你去家計會網站預約緊急避孕服務，佢哋會為你做身體檢查，為你提供醫療建議，比你選擇最合適嘅方法。
如果想了解多啲有關緊急避孕藥（事後丸）同銅性子宮環嘅詳細資訊可以參閱以下網址: https://www.famplan.org.hk/zh/health-info/contraceptive-methods/emergency-contraception
https://www.famplan.org.hk/zh/health-info/contraceptive-methods/intra-uterine-contraceptive-device-iucd
至於你話會唔會有可以透過飲食進行緊急避孕，暫時係未有相關科學研究支持嘅數據證明有可以做到呢個效果嘅食物。而對於其他宣稱可以in general 降低懷孕機會嘅食物，首先佢係降低機會，但唔係降到去完全冇機會，而即使佢能夠好似事前避孕藥咁真係有避孕功效，佢都需要時間建立藥效，唔會可以喺事後食從而獲得緊急避孕功效，而如果你睇嘅係相傳會滑胎嘅食物（姐係孕婦要忌食嘅嘢）都係要先懷孕先有得滑胎，成功率亦唔係100%，同時亦會對身體造成好大嘅傷害，甚至可能影響日後懷孕嘅機會。
所以，如果你係出於對身體健康嘅憂慮，我哋都會建議你去家計會尋求專業協助，越早求助，越能夠減輕對身體嘅影響～
如果你擔心會驚動屋企人，呢方面唔需要擔心，無論你係16歲以上或者以下，家計會係唔會擅自喺冇知會你嘅情況底下通知你嘅家長，除非得到你嘅同意，同埋佢地本身亦唔會有你屋企人電話～
但係提示返，一旦過咗緊急避孕時限，又確定懷孕嘅話，就會需要作終止懷孕手術。呢個情況下，任何在香港未滿18歲人士，要合法地進行終止懷孕手術的話，都需要女方嘅家長或法定監護人簽署手術同意書，先可以做到手術架～
希望以上資訊幫到你～
我唔係喺香港住…冇得去家計會拎藥…又冇得問身邊嘅朋友
仲要未夠歲數，如果真係中咗，又冇得自己走去落咗佢
如果而家底褲有啲透明狀，水水地嘅野，係屬於月經排卵期分泌物定懷孕初期嘅分泌物…
定係其實冇咁快知道…？
因為未知道你而家喺邊個國家居住，但相信唔同國家都有墮胎嘅限制年齡同我有關法例，所以呢方面好抱歉我哋未能夠話到俾你聽。但好似上面同事所講，今次嘅性行為的確有意外懷孕嘅風險，所以都建議你可以搜尋一下居住地方有冇一啲類似家計會嘅機構，可以俾你買到事後藥食先。如果係有效嘅時間內食嘅話，就唔會有懷孕風險。
或者如果你真係擔心嘅話，可以進行驗孕。因為驗孕棒係透過檢測尿液中嘅hCG (人絨毛膜促性腺激素)含量，呢款激素會係受精卵著床後開始大量分泌，而一般受精著床呢個過程需要6-9日，所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。
有關於分泌物方面，亦都有機會係排卵期分泌物，但因為平時有好多因素影響分泌物嘅狀態，所以都好難話俾你聽係由咩導致，而且照你所講呢一種分泌物嘅狀態都屬於正常。一般有關懷孕嘅分泌物轉變，例如着床性出血都會喺性行為後六至九日出現。