點氹黎M女朋友?

知道女朋友黎M會唔舒服
想問下有冇人知點樣可以令佢冇咁唔舒服?
同埋如果黎M個幾日
可以點同佢相處?
例如有冇話應該做咩會更好?可以點氹到女朋友?
有冇女職員可以話我知你地會想人點對你?

Hello​:ok_woman:t2:都好欣賞你會關心女朋友嚟M時候嘅狀況,如果你問到呢啲問題都相信女朋友係嚟M嘅時候出現情緒不穩,身體唔舒服等一啲我哋常聽到女仔嚟M嘅時候會出現嘅情況:face_with_peeking_eye:

介唔介意話俾我哋聽女朋友身體係點樣唔舒服?因為某啲女仔係嚟M嘅時候可能會覺得周身骨痛,子宮痛,頭暈頭痛等唔同種類嘅唔舒服,當然如果想對症下藥嘅話,就梗係了解清楚女朋友唔舒服嘅部份。例如如果周身骨痛嘅話,就建議多啲休息,可以嘅話可以做一啲拉筋嘅動作。子宮痛嘅話,睇吓佢屬於邊一種程度嘅痛,相信你都聽過十級痛嘅情況係連床都落唔到,咁就睇吓你陪唔陪到佢,又或者使唔使買藥俾佢食~

至於點樣相處,你意思係指佢比較敏感?唔開心?定還是係成日都好嬲?情緒方面會唔會可以講多少少?其實好多時呢一啲情緒轉變會喺月經前後出現,係因為荷爾蒙水平變得浮動,呢一啲係身體內在形成嘅轉變,都真係好難控制,而且係身邊嘅人都未必識得處理。但我相信只要你俾女朋友知道你明白佢嚟M嘅時候會出現嘅狀況,多啲陪佢,做一啲可以放鬆身體嘅活動,又或者陪佢食佢鍾意嘅嘢,相信女朋友都知道你係想關心佢:smiling_face_with_three_hearts:

佢話會肚痛
同埋成日都會肚屙
不過我都唔知M到同肚屙係咪真係有關係
定只係佢食錯唔知咩
咁佢同我講唔舒服
我咪同佢講叫佢休息下唔好亂食熱氣食物之類
咁我覺得我都只係可以咁做
都已經好明顯關心佢
有時甚至知佢M到個幾日會唔舒服
都比佢屋企休息唔約出街
佢又話我根本唔明
又會好易嬲我發我脾氣
又話我唔氹佢
我都唔知可以點

Hello~ M 到同肚屙係有關係架~

因為喺經期嘅時候,子宮內膜細胞會釋放前列腺素,去幫助子宮內嘅血管同肌肉收縮,從而令子宮內膜剝落(即係嚟M),如果身體分泌咗大量嘅前列腺素,佢哋會進入埋腸道內嘅肌肉度,令到腸道都一齊頻頻收縮,令大便更快被排出,如果咁啱喺水份未被吸收晒嘅時候已經排出咗體外,咁就會見到係軟便,姐係肚屙喇~

由於肌肉收縮可能會造成不適,所以可能會出現經痛同埋肚痛嘅情況,未必會關飲食事(當然如果喺經痛時飲/食凍嘢係會令肌肉進一步收縮,令經痛加劇~),如果你想透過飲食提供協助,可以試吓買常溫嘅電解質飲品(例如寶礦力)比佢,理論上會舒緩到少少症狀~

至於佢覺得你唔氹佢或者唔夠明白佢方面,或者你可以觀察下,通常佢向你表達唔開心或者辛苦嘅時候,會傾向想獲得你嘅陪伴、呵護,定係傾向想向你尋求解決方法~ 如果係前者,你可以試吓放低「想幫佢解決問題」嘅習慣,態度上亦都以心痛、呵護、照顧、陪伴多於提供實質建議,咁你同女友都可能會感覺舒服啲~ 如果係後者,你可以喺佢嚟完M 之後同佢商量下會唔會想睇吓婦科,尋求一啲緩減經期症狀嘅方法,同時亦可以睇吓有冇一啲婦科狀況導致較大程度嘅不適~ 同埋如果女朋友平日較少做運動,都可以選擇多啲一齊做下運動,因為血液循環好啲嘅話,理論上經痛嘅情況亦都會改善~

希望以上回覆幫到你啦:)