之前有五個月左右冇嚟月經，所以就8月尾就上咗家計會檢查，醫生就開咗娜迪比我。
頭兩個月冇乜副作用，亦都準時period！但到咗第三月，食完第一粒就好頭痛，第二粒就冇頭痛，食慾大咗、體重增加咗、而且好冇精神，成日都好頹，明明咩事都冇發生都好低落。
而家情況係：仲剩返10粒要食，我應該食埋先停，定係繼續食，定係中途而家停好？好怕繼續食會肥落去
多謝你哋抽時間解答問題
建議你見一見醫生 討論返個問題
Halo 聽你咁講
你都應該好唔舒服同辛苦。雖然正常嚟講服用避孕藥後係出現啲副作用，而每個人都會因為身體狀況唔同而可能出現唔同嘅副作用。普遍嚟講，呢啲副作用應該一至三個月後就會慢慢適應，之後就慢慢會消退；但亦有啲人需要比較長嘅時間去適應。
由於如果突然自行停藥嘅話，都有機會影響身體嘅荷爾蒙分泌，所以都建議可以先同醫生商量後再睇情況要唔要轉食另一款藥。不過當然，如果你覺得副作用嘅情況真係好唔舒服同好嚴重，會影響你日常生活，而又未必能夠短時間內就約到醫生嘅咁都可以先自行停咗藥先。不過都提一提你，停藥後會影響到避孕功效，無辦法再避孕；所以如果要有性行為，就記得要用安全套啦～同埋都要有心理準備嚟緊嘅月經可能會受到影響。所以就算決定停藥，之後都最好約返睇醫生～
1個讚
Hello>< 多謝你詳細嘅解答！
副作用方面，我係開始食第三包先至出現，所以好怕如果開第四包會仲嚴重⋯(第一二包係家計會買，而第三包係喺藥房買，唔知關唔關事)
因為我而家喺外國，所以好難預約到醫生。
想問吓，而家中途係會影響到下一個周期嘅，請問亂咗對身體係咪有唔好影響。
對身體就冇特別壞嘅影響，但當然就會打亂咗月經周期，因為停藥之後身體需要時間適應，由人造荷爾蒙變返去身體自然嘅荷爾蒙去控制月經周期，所以之後嚟月經嘅日子都未必同你而家食藥，嚟月經嘅日子一樣。
1個讚