你好 想問下我上個月28/9-5/10黎M
但到今日我仲未黎M ，今朝都有用驗孕棒驗過係一條 早幾日都有驗過…
想請問我隔幾耐先再驗會比較準確？
因為黎M一向都唔會相差太耐時間
如果隔幾耐都仲未有M到 再睇醫生？
會唔會有催經藥？
Hello, 明白你平時較準時嚟M但突然間咁耐都未嚟，令到你擔心自己可能懷孕。
不過月經遲嚟唔一定係懷孕，因為好多因素都會影響月經「準唔準時」，包括生活作息、飲食習慣、情緒壓力、荷爾蒙影響、疾病等等，咁基本上提早/遲嚟7日嘅月經都係正常，如果超過15日未嚟M或連續3個月月經週期唔正常就要睇醫生。當然發生完性行為之後好擔心自己會懷孕，呢啲都可能會轉化成壓力而影響咗月經。而單憑月經好難去判斷到係咪真係有懷孕，所以驗孕係一個比較客觀嘅方法去得知自己有冇懷孕。
而驗孕方面，呢度唔太清楚你係發生性行為之後幾多日驗孕，不過一般都建議喺發生咗性行為之後嘅7至11日之後驗，因為如果喺7日之後驗嘅話，就會得到初步嘅結果，11日或之後驗嘅話就會得到準確嘅結果。如果你嘅驗孕棒係來自可靠嘅來源，例如信譽良好嘅藥房或者大型連鎖個人護理商店，而你又係喺性行為之後嘅7至11日之後驗嘅話，而都係驗到一條線陰性嘅話，咁基本上都唔需要擔心有懷孕風險。
至於催經藥，無論月經遲黎係咩原因所致，都唔建議自行購買催經藥或者使用一啲坊間嘅催經方法，除左有機會催經無效之外，更加可能會傷害身體，所以建議你去睇醫生了解返身體狀況，睇下有無需要催經。
想問問如果睇醫生 應該係睇婦科？有冇觀塘區邊一間推介？
我依家既情況要唔要去睇醫生？定係再等下先？
Hello 如果睇醫生嘅話，可以睇普通科都已經可以。我哋都冇推介，你都可以上網睇吓唔同診所或者醫務中心或者醫生嘅評價，有冇邊間會適合你。你都可以再留意吓自己嚟月經未先。不過如果真係擔心嘅話，都會建議睇睇醫生，同返醫生講你相關情況。