Hellob想問下 如果打咗避孕針嘅話 排期嘅時候仲需要戴避孕套去預防懷孕嗎
Hello，首先避孕針係荷爾蒙避孕法既一種，荷爾蒙避孕法嘅主要原理係通過抑制排卵嚟避免懷孕。因為排卵期每個月都有機會唔一樣，甚至會同月經重疊，所以喺月經嘅頭五日內使用荷爾蒙避孕法效果最佳，能夠喺最大程度上保證係身體排卵之前抑制排卵，達到避孕嘅效果。
不過第一次使用荷爾蒙避孕法嘅話係需要比身體去建立藥效嘅，所以頭七日如果發生性行為，都要配合使用外用嘅避孕措施去確保成效。而如果唔係月經嘅頭五日內打針嘅話，係需要等14日先至能夠確保避孕效果嘅，因為如果身體已經排卵，咁避孕針就會通過改變子宮內膜環境去阻止懷孕，需要嘅時間會耐啲，所以係呢啲情況下，打針後頭14日發生性行為，都需要使用雙重安全措施，即要同時使用安全套。
而一般嘅情況下，如果準時打針嘅話，避孕嘅效果係可以高達99%嘅。不過都要留意，打針嘅頭三個月都係屬於適應期，月經係有機會唔規律嘅，身體亦都有可能出現唔同嘅副作用，所以都會建議頻密啲咁去複診，如果出現不規則出血，有機會要更換其他牌子/其他劑量嘅避孕針。