想問下
無套口交（唔長時間）
有套性交
因為除套個下 我快手左 冇睇到套有冇鬆咗
咁樣風險會大？
Hello~首先，性病係屬於傳染病，不分年齡、性別、種族，一般透過性接觸，不論係性交、肛交、口交或生殖器之間皮膚接觸，就有機會經由血液、精液或其他體液感染性病。而性病一般可以分為細菌型性病，或者係病毒型性病。前者大多數都可以完全根治，而後者大多數未有藥物可以完全根治，但可以控制病情，例如愛滋病，性病疣（椰菜花）。因為性病嘅傳染係要有體液嘅交換，所以有用安全套嘅話感染性病嘅風險相對嚟講會低啲。至於傳播途徑，除咗上述提及到嘅，性病主要以血液、精液、陰道分泌或其他體液作傳播媒介。性病一般經性接觸 (包括口交、肛交、陰道性交) 傳染。而有啲性病能夠透過皮膚傳染，例如椰菜花等，即係話就算用咗安全套都好，安全套cover唔到嘅其他位置都有機會傳染到性病。
回應番無套口交嘅性病風險，除非佢口腔裡面有流緊血嘅傷口或者已經有明顯病徵，同時你陰部都有流緊血嘅傷口，否則口交傳染性病嘅風險都好低。
不過針對一啲透過皮膚接觸可以傳播嘅性病，例如椰菜花、皰疹等，有可能喺口交過程中唔小心整穿咗，就有感染性病嘅風險。
另外，如果陰道交時全程正確使用安全套，感染性病嘅風險都係好低嘅。
明白都會擔心自己身體狀況，都可以做性病檢查嘅，以下機構提供免費嘅性病測試，有需要都可以參考下：
政府社會衛生科服務診所：各類型性病檢查（較全面，能即時知結果及比藥）
關懷愛滋：25歲或以下青少年、男男性接觸者－愛滋滋病病毒／梅毒／淋病／衣原體／丙型肝炎
香港愛滋病基金會：愛滋滋病病毒／梅毒／丙型肝炎
再思社區健康組織 (C.H.O.I.C.E.) ：愛滋病病毒／梅毒
可以先留意自己身體有無出現明顯病徵。如果已經出現下體痕癢、小便刺痛、分泌物異常、下體生粒粒等病徵時，就可以先及早求醫。
感謝回覆
咁如果最後出嚟發現甩左一半 （好似 我唔肯定 因為我好快就攞走左個套 但印象好似甩咗一半） 咁算唔算陰道分泌物直接接觸到性器官？
另外個個甩咗condom嘅位置係冇傷口 同埋好快就沖涼 想問下性病風險會大？
Hello~
假如安全套真係甩咗，性器官有直接接觸，咁係有傳播性病嘅機會嘅，但當然啦，大前提係對方都有性病，而安全套都真係甩咗。
最客觀嘅方法就係喺最後一次性行為嘅3 個月後，進行性病測試。
其實依加醫學昌明，好多性傳播嘅疾病都可以治癒，或者透過藥物控制。如果真係感染咗性病嘅話，就一定要積極進行治療。因為如果性病得到治療嘅話，致命嘅風險都係好低嘅。而當病毒或者病菌嘅數目受藥物控制，減低到冇辦法被檢測到嘅時候，咁即使你同其他人進行性行為，性病都唔會傳染俾其他人（Undetectable = Untransmittable)。即係話你係可以擁有正常嘅性行為同埋健康嘅仔女，所以及早發現及早治療最重要，同埋記住要定期檢測～
1個讚
好的～
因為冇睇錯係甩咗少少 一半咁
陰莖後端可能會有接觸
所以有啲驚
咁我呢排觀察下身體有冇咩異常先
留意身體狀況都係好好嘅習慣！現階段可以嘗試放鬆心情，例如做運動、見下朋友，都可以令自己心情舒服啲咖。
1個讚