你好，想問下如果我今個月13號做愛，然後無套外射左，14號食事後藥，但14號當晚又無套外射，可唔可以再食多次事後藥？因為呢排係排卵期，勁驚出事 
hello你好啊
首先，依個情況我地建議你可以盡快睇醫生，事後藥最耐可以係不安全性行為嘅120小時內服用，所以當你14號發生不安全性行為，最遲要係19號前食藥，因為事後藥係好高劑量嘅人造荷爾蒙，一個經期唔可以食多過一次，絕對唔可以用作長期嘅避孕方法，正正因為你喺14號已經食過一次，所以更加需要由醫生判斷可唔可以再食，加上事後丸係香港係需要醫生處方嘅藥物，所以你可以去私家診所、母嬰健康院、婦科診所或家計會睇醫生，等醫生判斷適合你嘅緊急避孕方法。
如果你係26歲以下及未婚嘅話可以去家計會嘅青少年保健中心，而已婚/26歲以上嘅話就可以去佢地嘅診所。不過留意返唔係每一間家計會診所都有提供婦女健康服務嘅，而無論係青少年保健中心/家計會診所嘅保健服務係必須預約嘅，你可以透過家計會嘅網上預約系統/致電該間保健中心/診所預約到診時間。有關家計會嘅健康服務詳情可以參閱以下網站: https://www.famplan.org.hk/zh/our-services/clinic-services/women-health/women-health-service/content 195 1
事後藥同避孕藥唔同，佢只可以用作為一種補救措施，即係話事後藥嘅效果係非常短暫，淨係針對一次嘅不安全性行為，就住嗰一次嘅性行為去抑制排卵、增加子宮頸黏液分泌令精子難以通過、改變子宮腔環境令受精卵難以著床，且其避孕有效性遠不如其他規律使用嘅荷爾蒙避孕法（如避孕藥）。
即使無係體內射精，但係性興奮時所產生嘅尿道球腺液可能含有精子，喺冇使用安全措施嘅情況下，陰莖同陰道有接觸，都會有一定嘅風險。
係到都想了解下唔用安全措施嘅原因，見到你喺14號食過一次事後藥，相信你都知道無套外射係有懷孕嘅機會，假如對方表示唔想用安全套嘅，希望你可以畀佢知你嘅感受同諗法，如果對方仍然要求唔用安全套嘅情況下發生性行為，我地係絕對可以拒絕嘅，並唔係因為對方號身分（例如另一半），就一定要順從佢。假如未有計劃生育，性行為嘅每一方都有責任選用適合嘅安全措施，對自己同埋對方都有一份保障。你都可以同佢溝通返，唔應該係你單方面去承擔懷孕嘅風險，你哋雙方都有權同埋有責任去用商議用咩安全措施並達成共識。