你好想問吓，我戴套之前因為要刺激返個陰莖所以手淫咗幾十秒，過程手指有接觸到透明分泌物，之後手指又接觸到安全套，所以安全頭外面有少少分泌物存在。但係入去之前我有再用潤滑劑覆蓋安全套，唔知咁樣懷孕機會大嗎？
同埋我有用Flo App紀錄女朋友經期，Flo App話當日懷孕機率低，係排卵期過後第三日，但係都會擔心分泌物搞到懷孕。求解答，謝謝。
Hello, 請問有Staff可以幫忙解答一下嘛
唔好意思，遲咗少少覆你
感覺到你應該真係好擔心。不過就以上情況睇，你意外懷孕嘅風險應該都好低。雖然安全套上可能都會沾有少少你陰莖分泌嘅尿道球腺液，但一般而言精子係空氣中暴露後嘅存活時間好短，除非你係再即時插入陰道，否則都好難會直接導致懷孕。
但其實你有呢個意識都好好呀！所以如果下次有相似情況發生，都可以先清潔下雙手以減低手上可能有分泌物嘅機率。當然下下要去洗手都好掃興，所以可以先係附近放啲紙巾清潔，基本上咁樣都唔會有太大問題。
另外，如果平時有正確使用安全套下都仲會有啲擔心同緊張意外懷孕嘅，都可以考慮下服用事前避孕藥。雙管齊下嘅安全性行為，係避孕效果上就更加有效啦～
感謝回覆 咁想問下類似Flo呢類紀錄月經應用程式係唔係準確？因為我女朋友呢兩三個月月經開始有規律, 所以個Flo預測嘅日期都算準確, 但未知佢對於安全期同危險期嘅預測準唔準
Hello 其實好難講準唔準確嘅，因為月經同埋排卵期都可以受好多因素影響而提早或者延遲，例如生活作息、情緒壓力、飲食習慣等等，每個月嘅月經周期都未必一定係一樣，可能咁啱今個月夜瞓咗，或者壓力大咗，或者食咗某啲嘢，都已經可以影響到月經。
而且每個人身體都係獨特，無論app定係醫生都未必可以100%預測到未來月經係咪一定會係呢日出現，只能夠作輔助。所以如果用佢嚟計月經，想方便計邊幾日嚟M，睇下用唔用M巾，去唔去游水玩之類都還可以，但如果用佢嚟計安全期同危險期就唔建議啦，畢竟都存在一定風險，而且如果咁啱今個月唔準嘅話，出事嘅成本都太高啦。