幾時驗孕準?

上星期排卵期間進行咗性行為,因為使用安全套不當所以18個鐘後食咗事後藥,中間冇乜副作用,但呢一兩日開始覺得全身有啲緊,下腹唔太舒服咁。性行為後9日、11日都分別用咗晨尿驗孕,都係一條線,預計5日後係經期,請問其實幾時驗孕嘅結果會比較準?同埋食完事後藥之後嗰個月嘅經期會有咩影響?會唔會有機會如期嚟?

hello 你好啊

首先,你係性行為後18小時進食事後藥,避孕成功率高達95%嘅!緊急避孕藥係通過高劑量嘅荷爾蒙抑制排卵,或者當身體排卵之後抑制卵子受精,亦會改變子宮內膜嘅環境令到受精卵難以著床,從而達致避孕功效;而高劑量嘅荷爾蒙的確會造成一啲副作用,包括噁心、嘔吐、不正常出血、乳房疼痛、腹脹、腹痛、頭昏、頭痛、疲勞等等,一般唔會持續超過24小時。

而事後藥其中一個副作用係有機會會影響1-2個月經週期,可能你嚟緊嘅月經周期長度、經血量、流血日數、經痛程度等等會同平時嘅平均水平有所不同。1-2個週期之後會相對穩定返。

驗孕棒係透過檢測尿液中嘅hCG (人絨毛膜促性腺激素)含量,呢款激素會係受精卵著床後開始大量分泌,而一般受精著床呢個過程需要6-9日,所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。即係話你係性行為11日後做嘅驗孕所得出嚟嘅結果已經好準確喇!

係到都想提醒下,事後丸係唔可以作為常規嘅避孕方法,只可以作為一種補救措施,一個月經週期只可以食一次,一年唔可以食多過三次。且其避孕有效性遠不如其他規律使用嘅荷爾蒙避孕法(如避孕藥)。而喺服用緊急避孕藥之後,呢個月經週期剩餘嘅時間,同埋之後嘅日子,都一定要使用其他高效嘅避孕方法先可以避免意外懷孕,從而保護自己。

見到使用安全套時都可能唔太正確,你可以檢查一下自己有冇跟足步驟,減低安全套失效嘅風險: 《Stickypedia系列-安全性行為:第一寶》 5

而一啲常見嘅錯誤就包括:

-正反調轉

最常出現嘅意外喺將安全套正反調轉咁套咗入陰莖。正面嘅時候安全套嘅膠圈應該向出,如果膠圈被套套包住嘅話就表示係反面。當反轉咗嘅安全套已經掂到陰莖,就有機會沾到尿道球腺液Pre-cum,呢種分泌物都有機會含有精子。如果就咁反返轉嚟用的話,其實分泌物就會直接掂到將要插入嘅地方,例如陰道或肛門。所以如果發現反咗,都係攞一個新嘅安全套使用啦~

-安全套嘅材質同潤滑劑不相容

要留意嘅係油性潤滑劑係唔可以同乳膠造嘅安全套一齊使用,因為油性嘅物質會侵触乳膠,增加安全套破裂嘅機會。水性、矽性或者水矽混合型嘅潤滑劑就可以同乳膠安全套一齊使用。

正確使用安全套、全程按住指示去佩戴,及確保沒有穿漏,精液或尿道球腺液內嘅精子並無接觸陰道,基本上會導致懷孕嘅可能性係好低嘅。