迷惘😓。。。

我係女仔,但有一個女仔好似好鍾意我咁,而我又離奇地成日好在意佢,好似同佢吾單止係朋友嘅關係,但又吾可以話我鍾意佢
究竟而家係發生咩事:exploding_head:

Hello你好啊,多謝你同我地分享你嘅煩惱啊~
見到對於自己同身邊一個女仔嘅關係令你好困惑,一嚟,佢好似中意你,二嚟,你都好在意對方,令你懷疑自己都中意佢,依個突然嘅轉變可能同你一直對自己嘅認知唔同,令你感到好不知所措。

首先,我地都希望你明白,愛係無分性別,由細到大,主流媒體中,大部分嘅親密關係都係由男女結合而成,令我地都覺得好似只有一男一女嘅關係先係正常,但現實中並唔係咁嘅,愛可以有好多模樣,有時我地會面對「我究竟係同性戀定異性戀」呢條好經典既問題唔知點揀,不過其實答案係唔駛揀呀。我地每個人既性向(sexuality)其實唔係同性戀或者異性戀二揀一,而係會落係一個光譜(spectrum)既某一個點上面。想像光譜既一端係絕對只鍾意同性(exclusively homosexual),另一端係絕對只鍾意異性(exclusively heterosexual),而中間有好多好多位,譬如多數時候都鍾意同性而偶然會鍾意異性,同性異性都同等鍾意。性取向係你個人既一種特質,係冇一定標準既,要相信自己既感受呀:)

見到都提到好在意對方,唔確定自己對對方嘅情感,或者試下俾啲時間自己啊,相信更多相處嘅時間可以令你更了解你對對方嘅態度、感受。

1個讚

但其實我都認為自己算係個跨仔,有呢種感受係咪都好正常?:sweat::heartpulse:

你好:)好似同事所講咁,愛係無分性別架:)所以唔會話因為係跨仔所以先至會對女仔有感覺,因為無論你係順性別定跨性別,對方又係乜嘢性別,都係OK 架!
因為,有受人吸引、有鍾意嘅感覺,係好正常嘅~

至於如果你問嘅係「認為自己係跨仔」正唔正常,係正常㗎!因為你嘅性別認同(gender identity)係在於你覺得邊種描述更貼近你嘅身份,所以如果你覺得「仔」係一個更貼切嘅描述,咁就係㗎啦~

呢個位會想提示返,即使你覺得「女」唔貼近你嘅身份,都可以同時覺得「仔」都唔貼近㗎,因為性別唔係二元嘅,「非二元性別」(non-binary)都係一個好多人認同嘅性別~ 「非二元性別」之下都仲有好多唔同嘅性別認同,你可以睇吓以下連結,睇吓會唔會有邊一個令你感覺最貼切~

https://genderempowerment.org/2020newsite/archives/5145/非二元性別之-哪裡只得男或⼥/

再次提醒,一啲已有嘅標籤或性別認同都係僅供參考,因為每個人都係獨特嘅個體,唔係話一定要搵到一款然後就以此標籤自己或者將自己歸類,呢啲只係一啲方便了解自己嘅工具嚟架咋~

希望以上回覆幫到你:)