扑野甩咗套

同男朋友做做下轉位嘅時候個套甩咗出黎(個套係體外甩咗) 跟住佢再帶番同我去扑野 想問會唔會出事…?同埋點解個套會咁容易甩出嚟…?會唔會關陰道太潤滑…?

同埋想問避孕藥係點運作?係咪一開始食就會有避孕藥效?

Hello 你好~

安全套脫落後再重新戴上使用,係會帶嚟一啲懷孕風險嘅,因為喺勃起後、射精前,陰莖會分泌尿道球腺液,裡面會含有少量精子,而喺脫落再重新戴上嘅過程,有機會會接觸到套入面或陰莖上嘅尿道球腺液,然後再唔小心hi 到喺安全套嘅表面,咁裡面嘅少量精子就有機會會進入到陰道喇~ 所以如果你距離你發生性行為仍然係72-120小時內,你可以考慮去家計會,使用佢哋嘅緊急避孕服務,咁就萬無一失喇~

至於點解會咁易甩,係唔關陰道太潤滑事嘅,有機會係因為:
1)轉姿勢嘅時候,陰莖離開緊陰道,但係陰道口嘅肌肉收緊咗,令到捉實咗個安全套,咁陰莖抽出嘅時候,安全套就會部分留咗喺陰道度,令到安全套從陰莖上脫落
2)安全套嘅尺寸唔啱,令到一直都係鬆鬆地,喺冇戴穩嘅情況下就容易脫落
3)喺轉換姿勢嘅時候,陰莖冇咁充血而一度變軟同微微縮細,令到安全套變咗oversized,變得容易脫落

要避免以上情況,首先可以確定吓用緊嘅呢款安全套係咪合身,要可以喺勃起時拉到最底同時冇鬆泡泡,亦唔會因為太緊而造成不適~ 然後喺轉姿勢嘅時候,要用手固定安全套嘅環喺陰莖底部,避免佢因為陰道口收窄而脫落~ 而如果真係轉姿勢嘅時候鬆脫咗,要記得唔好重用同一個安全套,而係應該開一個新嘅安全套嚟用~
咁就可以盡可能避免脫落同埋因此造成嘅懷孕風險~~

事前避孕藥嘅話,佢係透過每日準時服藥嚟建立避孕嘅藥效嘅,成功建立藥效後,佢會可以透過抑制排卵、改變子宮頸黏液黏稠度、令子宮內膜變薄、干擾輸卵管蠕動去達成避孕嘅效果。服用事前避孕藥通常會以28日為一個周期,唔同牌子會有唔同嘅服用方式,例如:連續每日服食24粒有藥效嘅藥,再食4日冇藥效嘅藥,冇藥效果幾日就會嚟月經;或者連續每日服食21粒有藥效嘅藥,然後停藥7日比月經嚟~ 一般嚟講會建議喺月經嚟嘅頭一日開始服食,咁就可以即刻有避孕功效,但如果唔係月經開始嘅時候開始服食,就會需要起碼7日去建立藥效,所以都唔係一食就可以避到孕,服用初期都要使用額外安全措施㗎~

想知食事後藥嘅副作用有咩 未試過:pray:t4:

你好~ 事後丸嘅副作用包括:頭痛、噁心、頭暈、疲倦、經痛、腹痛、背痛、乳房脹痛等等,因為係高劑量嘅荷爾蒙,所以副作用會比較強,但一般嚟講唔會維持超過24小時~

如果想了解更多有關事後丸嘅資訊,可以睇睇呢度:

同時亦提示返,因為係高劑量嘅荷爾蒙,所以一次月經周期內只可以食一次事後丸~ 同埋事後丸同事前藥一樣,唔係每個人都適合服用,記得要經醫生評估再處方先好服用呀~:)