係咪會有高風險

本人喺4/12日同男朋友發生性行為,不過只係喺上面摩擦,並沒有插入去,不過我黎M既日期係27/11 ~2/12,而月經週期大約係24日,聽人話排卵期前三日會有風險,想問一下係咪好近排卵期同埋會唔會有風險懷孕:pray:t5:thanks!!

Hello, 無插入式性行為嘅話,懷孕風險係比較低嘅。不過都要留意,男性係性興奮嘅時候陰莖勃起時會分泌尿道球腺液,裡面會有少量精子,都有導致懷孕嘅風險,如果陰部都有分泌液,係摩擦嘅過程中尿道球腺液都有流入陰道嘅風險導致懷孕。

而月經週期受到好多因素影響,所以排卵期並唔係每個月都係同一日,咁係理論上排卵期會係月經週期嘅一半嘅前5日至後4日,不過要月經週期比較穩定先可作參考。如果想準確知道排卵期,可以用排卵試紙或者排卵棒做測試。

可能都仲會擔心有懷孕風險,可以考慮服用事後丸。而事後丸係香港係需要醫生處方嘅藥物,而且有分性行為後72小時或者120小時內服用兩種。而24小時內服用效果最好,所以都建議盡快揾醫生求診。可以選擇去家計會診所、普通私家門診或者婦科診所。或者係性行為後7日使用驗孕棒會有初步嘅結果,而係11日後驗孕結果會更加準確。

想再問一下我今日係黎完M第三日,有啡色分泌物係咪代表係排卵期:pray:t5:

想再補充一下~男朋友當時話我陰部冇咩分泌物,算乾,咁係咪會比較低機會懷孕,麻煩晒:pray:t5:

咁嘅情況都唔一定代表係排卵期嘅,因為有時月經之後出現啡色嘅分泌物,係因為子宮排出緊一啲未清晒嘅月經。而且唔係每一位女性經歷排卵期嘅時候都會出現啡色嘅分泌物。

另外有關性行為當時陰部嘅狀況,冇乜分泌物都唔代表意外懷孕嘅機會較低。因為如果精子真係成功進入子宮,佢最多可以喺裏面存活三日。所以當時陰道嘅狀況同意外懷孕嘅機會冇直接嘅關係。