你好
我上一次月經係11月10號至11月14號
11月24凌晨3點有不安全性行為，然後隔天早上即刻食咗事後避孕藥
係11月30號有發生出血，維持咗三日 即係去至12月2號
係12月8號有驗孕 （無中）
12月6號有發生性行為 （有帶安全套的）
但事後覺得都怕懷孕，所以係今日12月11號再用驗孕棒check
用嘅係clean blue ultra early
佢嘅說明書係話出現兩條直線先等於係懷孕
但我check完嘅結果得出嚟嘅係， 一條橫線，一條直線 （總共兩條）
依加好擔心嘅係，係唔係已經懷孕。 但佢嘅說明書同我得出嚟嘅結果又唔同，所以我感到好疑惑。
所以我用埋clean blue嘅 digital test
今次又話我no pregnant
可唔可以話比我知點算好，依加好大壓力 好怕有事
你好呀
聽得出你依家應該好緊張同擔心呀。我先簡單回覆，初步咁睇張相就應該唔係有咗嘅，但如果好緊張同好擔心嘅，都建議你再買多一枝唔同牌子嘅驗下，以求安心。
我地分開兩次性行為咁睇啦，如果最近期個次嘅性行為都有正確使用安全套，而且過程中冇出現甩套同穿套嘅情況，咁其實意外懷孕嘅風險都唔算好大。其次，就想先了解下你11月25號早上服用個粒事後藥係未都係醫生處方（即係去家計會/診所/醫院檢查，再即場服用）？如果都確認係由醫護人士睇住嘅情況下正確地服用，咁個次性行為嘅意外懷孕嘅風險，係服用事後藥後都已經較低；但當然啦，始終都有風險嘅，所以你去買驗孕棒去check係做得好啱㗎。
至於驗孕棒方面，以我咁睇張圖就係無懷孕嘅。因為其實你所見到個個打直嘅線係唔計算嘅，只有橫線先計係有效嘅線；另外，你都可以留意下有無將檢測棒放太耐後，先再睇結果。如果過咗說明書上嘅觀察時間後再睇結果，都係唔準確的。所以以目前張相嚟睇就唔計懷孕嘅～
另外，使用驗孕棒上都可以提一提，記得要跟足說明書嘅指示、程序、等待及有效時間等，而且建議驗前就避免飲水同最好用朝早第一次小便嘅尿液做檢查，以確保檢測棒最為有效。
所以見你都較擔心嘅情況嘅話，我都建議你再買多枝唔同牌子嘅驗孕棒做多次結果，咁都應該會無咁擔心 
唔好意思呀
我意思係支棒上面無話會出現橫線
但我果支卻出現橫線
所以 照道理講 我都出現咗兩條線
會唔會有機會係有咗？
定係支驗孕棒出現錯誤？
今日我用同一支驗孕棒再check多次
係無事的
咁姐係代表我無中到嗎？
另外想問下，我食完事後丸後嘅果次出血係唔係代表係月經？
但我依加出現咗胸痛嘅症狀 會唔會係懷孕初期症狀？
Thank you so much
睇返你上面張圖，其實”pregnant”下面個個圖正正就係代表要係個個類似壺蘆形嘅結果區有「兩條橫線」先叫做pregnant呀，所以唔洗擔心，你上面張圖嚟睇只係得「一條藍色嘅橫線」，係代表無懷孕呀；另外，說明書都有顯示一條線係等於冇懷孕，你可以留意下。
再加你今日都有再check到，其實都應該不用太擔心了。反而如果你仲好擔心，會唔會好似我上面咁講，都考慮下用另一個牌子嘅驗孕棒呢？或者係去家計會，由姑娘幫你驗孕。
咁就有多啲方向比你去考慮下，而唔洗咁擔心。
至於出血，就要視乎出血嘅份量。如果係有嚟咗幾日而且份量都同平時月經差唔多嘅，咁就係計月經了。至於胸痛情況，我就唔能夠單獨因為你有胸痛症狀，而判斷你係咪懷孕初期；但如果幾次驗孕棒都顯示並冇懷孕，而你又有嚟月經，咁基本上都唔係懷孕了。
