停事前避孕藥及懷孕問題

本身因爲一d原因開始食避孕藥,但食左3日就發現都係唔洗食所以停左 (30/11第一日黎m, 7/12開始食,食到9/12)到左11/12開始有啡色分泌物咁,18/12有血但唔算好多,期間係9/12有過性行為(有無套插入一陣)請問懷孕機會大嗎?

Hello, 想首先問下你喺食避孕藥之前有冇諮詢過醫生嘅意見?因為如果你係第一次服用避孕藥的話,一般都會建議服用避孕藥之前,必須諮詢醫生嘅意見,等醫生評估你嘅體質/生活習慣,係咪適合服用避孕藥,或者適合服用邊一個牌子/款式嘅避孕藥 。因為每個牌子/款式嘅避孕藥內含有嘅荷爾蒙類型同埋劑量都會有唔同 ,有機會某部分避孕藥唔適合你嘅體質,係有機會引致嚴重嘅副作用。 避孕藥亦並非每個人都適合服用 ,一般常見唔適合食藥嘅情況,例如有心血管疾病、不規律陰道出血、體重過高等。

避孕藥係荷爾蒙藥物,服用之後會令你血液中嘅激素水平喺一驟間提高。直到你停藥,激素回落至一般水平嘅時候,多數會產生子宮內膜部分脫落嘅副作用,導致陰道出血,臨床上呢種出血情況稱為「撤退性出血」,表面上佢同真正嘅月經好相似,但實際上呢種出血唔係一般嘅嚟M,因為呢段出血時期唔係按照正常嘅月經周期日子嚟計算,而係受到藥物干擾之下產生,所以只能夠叫做「替代月經」。

而避孕藥嘅藥效需要身體適應並每日服用才能建立,首次食避孕藥都會建議係月經頭5日之內開始,而頭7日如果發生性行為都需要額外使用安全套。你服食3日並發生無安全措施的插入式性行為係會有懷孕嘅風險。建議係進行性行為嘅7日後進行驗孕,會得到初步嘅結果,而11日之後就會得到一個相對準確嘅結果。

謝謝你的回覆,我唔係第一次食避孕藥都冇見醫生,尋日驗過冇懷孕,所以我宜家既出血應該係受藥影響?謝謝

Hello 因為你係9/12發生過性行為,如果你琴日驗孕嘅話,係都已經有11日,結果已經係準確㗎啦,而結果又係陰性嘅,咁相信就唔係有懷孕。

而的確食避孕藥係可能會有不規則陰道出血呢種副作用嘅,特別係可能你食咗幾日又停咗,就更加容易出現呢種副作用,所以你而家嘅出血都好有可能係受避孕藥影響而出現。

如果呢種出血情況唔係好嚴重嘅話,或者冇持續好耐嘅話,都唔需要太擔心,因為都係正常情況。不過如果仲有其他唔舒服,或者出血情況變得嚴重嘅話,就可能要去睇醫生啦。

希望幫到你。 :blush: