如題點算好 做完先發覺穿咗
使唔使食事後 但係家計會冇開
你好，呢個情況都建議你服食事後避孕藥，因為就算過程中冇射精，勃起期間都會有分泌尿道球腺液，而當中係會含有精子，所以有進行插入式性行為而安全套穿咗或者冇戴安全套，個懷孕風險都會高㗎～
事後丸嘅有效時限分為兩種，一種係性行為後72小時內，另一種就係120小時內，所以聽日去診所拎取都係趕得切喺有效時限內服食嘅。事後丸喺香港係法律規定必須經醫生處方嘅藥物，因為唔係每個人嘅身體同情況都適合透過事後丸做緊急避孕，所以建議去家計會或者一般私家診所經醫生處方。
家計會處方緊急避孕藥嘅收費係$60-$70一劑，而醫生評估嘅收費大約係$150-$200，至於私家診所嘅收費因爲相對浮動，所以建議直接致電去診所了解下，不過一般私家診所嘅收費都相對家計會貴嘅～
如果時間上趕得切，選擇去家計會嘅話，26歲以下嘅未婚人士可以去佢地嘅青少年保健中心，而如果係26歲以上嘅話就要去佢地嘅節育指導診所，但就需要先經電話預約，有關緊急避孕嘅詳情可以參閱以下網站: