性交障礙?

你好,我和男朋友都從未有過性經驗,已經試左好幾個月,都未能成功做愛。起初男朋友嘗試擺陰莖入去陰道時,都未入到個頭,我已經覺得好痛⋯手腳不自覺會推開男友,雙腳會合埋⋯上網睇覺得有機會係陰道痙攣,就學網上的方法,試吓擺手指入去先⋯練習左好幾個月,由一隻手指都覺得好痛,至到依家陰莖終於可以放晒入陰道。但係暫時只可以擺係度,(已經係要強忍住痛),唔可以郁,一有任何動作都好痛好痛。然後一痛陰道就會即刻乾晒⋯男朋友想再試入都唔得。想請問咁樣其實係咪應該要睇醫生?

另外,就係想問關於男友性功能方面。我會幫男朋友含同用手,有時佢會話好舒服,覺得就嚟想射,但最後都係射唔岀⋯同埋好多時,佢都會無啦啦軟左⋯eg做前戲時會慢慢硬,但再耐多少少或者幫我捽陰蒂時佢又會軟返。所以有時我好有feel覺得佢可以入既時候佢又軟左。其實男人興奮係應該會keep住硬?定係真係會軟下又硬下咁?有時男朋友陰莖成功入到我陰道,但我太痛想佢抽返岀黎,之後想再試入(within 2-3 mins),男朋友又會可能軟左。咁樣又正常嗎?

我哋既問題好複雜,謝謝解答!

你好~ 首先你即使會痛都繼續嘗試、練習同探索,係好勇敢嘅事~ 以下先提供一啲方法,睇吓會唔會可以令情況改善先!

1)練習或探索嘅時候,嘗試放鬆,容許各種可能出現嘅結果:
嚟到而家已經可以放到陰莖入去,可能每一次嘗試都係以成功發生性行為為目標,呢個情況下,加上可能會痛,身體好容易緊繃~ 如果太過緊繃,陰道口嘅肌肉可能都會進入「緊握」嘅狀態,令到過程困難同時又非常之唔舒服、甚至痛~ 所以如果可以嘅話,先放低「今次一定要成功!我要令到個身體習慣/做到!!」之類嘅諗法,容許自己嘗試得嚟唔係必然要承受痛苦,唔成功嘅話可以下次再試,比自己盡量以身心都放鬆嘅情況下進行練習~ 如果你想嘅話,都可以喺沖完熱水涼,身體比較放鬆嘅時候去嘗試,可能會容易啲:)

2)嘗試之前,先令自己性興奮起嚟~
一般嚟講身體要喺性興奮嘅時候先會分泌天然嘅潤滑液,同時隨住有足夠嘅刺激,陰道口嘅肌肉都會慢慢放鬆,預備有嘢進入體內~ 所以如果未夠興奮、未夠潤滑,肌肉亦未放鬆嘅情況下有嘢進入陰道,係會好唔舒服甚至痛嘅~ 所以不妨搵一啲能夠令自己興奮嘅嘢睇吓,再刺激下陰蒂或者其他敏感帶,去到咁上下先去嘗試比一啲嘢進入陰道,咁應該會容易少少~

3)進入身體嘅工具~
手指當然係最方便嘅工具,但如果手指都有機會造成不適或者痛楚,可能要試吓一啲醫療用嘅陰道擴張器,佢哋會係柔軟、直身嘅棒,最幼嘅棒會比手指尾更幼,咁心理壓力會細好多,同時亦都可以循序漸進咁習慣唔同直徑嘅棒狀物,效果可能會比增加手指數量更好呢~(因為幾隻手指嘅形狀都難以做到接近棒狀物)

4)要用潤滑液!!!!!
無論本身身體習唔習慣有嘢插入,只要唔夠潤滑液就會造成不適甚至痛楚,所以無論係練習定係同男友一齊試,都一定一定要用潤滑液,因為佢可以物理上防止你受傷,亦都可以減低你嘅心理壓力呢!

5)唔好急,慢慢嚟!
理論上,要慢慢去適應更大尺寸嘅嘢,係應該要去到size A 已經毫無難度(零個痛、零個夾硬、零個勉強,可能要慢慢入但係過程中真係冇任何唔舒服)先至move on 去size B 嘅,所以可能可以先用返啲細少少嘅嘢去練習,比自己身心都慢慢適應成個過程同感覺:)記得,唔係要一嘢成功啪晒成舊嘢入去,而係可以入咗少少,停低抖抖,冇唔舒服再前後郁少少,確定冇唔舒服先再推入多少少~ 身體適應外物係需要時間嘅,所以記得慢慢嚟,以無唔舒服為前提去繼續嘗試/練習啊~

你可以先試吓以上嘅一啲方法,睇吓會唔會有好啲,如果情況冇改善甚至嚴重咗,就可能要尋求嘅醫生或性治療師嘅協助喇~

至於男友嘅性功能方面,每個人能夠維持硬嘅狀態嘅時間都唔同,射精所需要嘅時間/刺激程度都唔同,亦都好容易受到唔同因素影響,例如:生活習慣同作息情況、有冇做運動嘅習慣(血液流動暢順與否會影響充血程度同時間)、情緒狀況、壓力等等~ 如果習慣以高強度刺激自慰嘅話,亦有可能因為刺激減低就好快軟(因為身體習慣咗高強度刺激);而冇咗性刺激一段時間之後會變軟都係正常嘅情況嚟嘅,因為身體會誤以為已經成件事完咗,唔需要再硬落去~

所以前戲嘅時候,可以試吓互相刺激,即使係男友幫你刺激緊陰蒂嘅時候,你都可以用手刺激佢嘅陰莖~ 如果係抽出之後變軟,導致無法插入,男友亦可以試吓用手刺激返個陰莖,令佢變返硬~ 如果長遠嚟講喺有刺激嘅情況下都難以保持硬度,就可能要平日都會做一啲練習同調整,探索返需要點樣嘅刺激令硬度可以維持,或者向醫生或性治療師求助喇~

希望以上回覆幫到你啦!:)