食事後丸後月經量少

SEX:: 有關性的
1

Hello 想請問下我仲係處 係今個月1號同男朋友有磨蹭陰道嘅行為 磨蹭前佢已經戴咗套 之後佢龜頭有進入咗少少 只係入咗幾cm唔係好入 而我地全程都係保持龜頭只係進入少少嘅狀態 途中我地突然聽到卜一聲 我以為係我處女膜穿咗 但檢查咗發現無痛無流血就不以為然 佢最後戴住套係我入邊射咗

完事之後我發現陰道附近摸落有d黏笠 我第一下以為係自己嘅分泌物但諗諗下覺得有少少奇怪 之後就即刻叫佢check個套 點知發現真係穿咗

由於紅日家計會無開所以我地去咗診所睇 睇完之後醫生開咗Levonorgestrel嘅事後丸比我 牌子係Postrnor-2 醫生叫我盡快食1粒 然後12個鐘後再食1粒 由發現個套穿咗到食第1粒藥係within 2個鐘內

我最近呢10個月經期都比較準時 通常28-30日就會準時到 而我本身上個月經期係12月13日到 醫生都有同我講話食完藥可能會提前/延遲/照跟返上個月嘅日子咁嚟m 而我係7號夜晚開始就有少量嘅啡色分泌物 通常都係抹先有 護墊上就無咩 呢個情況持續咗兩日係9號終於有血但係唔算話勁多 不過有一下唔小心整咗一攤係廁所板上面 但10號就已經無咩血 m巾上面都係得好少 而到11號更加無血 又係得返抹先有嘅啡色分泌物

自從1號件事發生咗之後成個人更加焦慮 成日諗住會唔會有咗 所以我想請問

1.如果只係龜頭進入咗幾cm而我仍然係處女 加上31號男朋友已經射咗2次 1號射嘅量好似唔多 呢個情況下算唔算插入式性行為同懷孕嘅機會大唔大 (因為見有人話呢d情況有機會會導致宮外孕

  1. 由於醫生話空肚食藥可能會有唔舒服嘅情況出現 所以我之後食咗少少野即刻食咗1粒藥 食完藥我有繼續進食 但見d人話食完藥要隔2個鐘先好進食 如果即刻食野嘅話粒藥就無作用 請問係唔係真的

  2. 由於我本身作息唔定時成日捱夜 最近唔洗返工好多時更加凌晨5,6點先訓 鍾意食生冷野 我之前嘅m量都唔算好多 可能第3日已經開始得好少 第4,5日更加得幾滴/可以直情用護墊 但未至於好似今次咁第2日已經得好少 所以我唔係好肯定咁樣算唔算嚟m 定係撤退性出血/著床出血 見你地話著床出血係可能得1滴/1張護墊就搞得掂嘅量 而我提到第1日有唔小心整咗一攤係廁所板上面 咁係咪可以排除係著床出血

  3. 如果今次算係月經嘅話個量咁少係咪正常 因為之前嚟就算少都唔會少到咁 同時我今日月13號係咪就唔會再嚟m的

  4. 如果9號呢次算係月經咁正常我下個月係會照跟9號嚟定係跟返之前13號先嚟

  5. 唔知係自己成日形住形住定咩 呢幾日覺得個胸好似有少少痛 想問係咪正常的

唔好意思第一次發生呢d情況所以比較驚同好多問題問 有諗緊今個星期日買驗孕棒嚟驗下 想問下如果驗完係一條線係咪代表一定無懷孕 會唔會有可能用第二隻牌子驗會出兩條線 因為未用過 麻煩晒:pray:t2::pray:t2:

2

今日訓醒發現護墊有d啡色分泌物 似係血乾咗個種 然後用紙巾抹下面都有幾多啡色分泌物 抹咗3張紙巾都仲有少少

3

Hello你好啊，等我都逐條問題回答先！

1）只要性器官有直接接觸，就有懷孕嘅機會。另一半前一日已經射過精其實同懷孕機會冇直接嘅關係，因為男性每一次射精都會有精子，而精子嘅數量同懷孕機會都冇直接嘅關係，即使精子數量少唔代表懷孕機會低，同樣地即使精子數量多唔代表懷孕機會高。都見你提到處女膜同懷孕風險嘅關係，處女膜正確學名係陰道冠，佢並唔係完全密封嘅。女性一出世嘅時候呢塊結締組織上面就已經會有一定嘅開口，等分泌物同月經流出，所以並唔存在處女膜未破裂就無懷孕風險嘅講法嘅，亦都同宮外孕無直接關係嘅。

2）服用事後丸嘅時間可以係空腹或進食前後服用都可以。食完之後冇嘔吐冇嚴重腹瀉，咁就會有好高嘅避孕成功率。

3）著床性出血係指當受精卵着床喺子宮壁嘅時候有機會造成嘅少量出血，通常只會有幾滴或者最多一塊護墊可以承載到嘅血量，而且係一次性，唔會持續地出血幾日，血嘅顏色亦會同月經嘅唔一樣，會偏粉紅。通常只會一日內一瞬間流完。一般由受精到着床大概係性行為後六至九日就會發生。而着床性出血並唔係一個常見嘅現象，即使真係因為懷孕都係只有少部分女性會出現嘅情況。

你嘅情況都有機會係撒退性出血，係食咗事後丸之後嘅副作用嚟嘅，因為事後丸係高劑量嘅荷爾蒙嚟，喺緊急避孕同時會打亂你身體嘅荷爾蒙水平，從而導致不規則陰道出血，加上你喺性行為後兩小時喺醫生嘅指導下食藥，成功率係高達97-99%嘅～

4-5）正如醫生所講，因為事後丸係好高劑量嘅荷爾蒙，好大機會會影響經期，可能會提早或者延遲，服用事後丸之後，之後一次嘅經血量係會有機會變少，所以無需太擔心。撤退性出血一般出血量係會比一般月經少，而持續時間比較短，一般亦都會自行停止。如果出現撤退性出血情況，出血日子同一般月經嘅日子相近，出血情況持續，經血量亦同一般月經近似的話，都可以視果一次出血為一次月經，再重新計算月經週期。

6）乳房脹痛都係服食事後丸嘅常見副作用嚟嘅。

驗孕棒其實係透過尿液測緊hCG嘅水平。咁咩係hCG呢？就係如果真係懷孕，當受精卵著床，身體就會分泌嘅一種荷爾蒙，而hCG嘅分泌會隨著懷孕嘅日子增加。一般來講，7日已經會有足夠嘅水平可以檢測得到初步結果，11日之後就會有好準確嘅結果，所以如果今個星期日驗孕，就有準確嘅結果喇，你可以去信譽良好嘅藥房，或者大型連鎖個人護理商店買驗孕棒，咁都好可信嘅，如果真係好擔心，都可以買兩款嘅驗孕棒～

最後想分享少少有關安全套嘅資料，有好多原因可以導致安全套穿嘅，例如購買左唔啱尺寸嘅安全套，或者戴反咗、安全套過期、用咗唔適合嘅潤滑或者唔夠潤滑、劑撕開包裝嘅時候太粗暴唔小心整穿咗等，都有機會造成安全套穿窿嘅情況。所以都建議可以度咗尺寸先買合適嘅安全套，至於點樣量度可以參考返以下呢個post：https://www.instagram.com/p/CNmt0RpDzpy/?igshid=YmMyMTA2M2Y%3D 2

另外，都可以檢查一下自己有冇跟足步驟，減低安全套失效嘅風險: 《Stickypedia系列－安全性行為：第一寶》 3