唔知點算好

我剛收到報告,說HIV / 梅毒都無事,但下面仲有好幾粒東西,我有時都會生瘡,都係諗緊觀察幾耐先睇醫生。

另外,早前中過兩隻菌,已好返,今日問醫生可否捐血,醫生話無問題,外國對這兩隻菌都無限制捐血,香港都已更改左指引,但都擔心唔想講過往病情。其實心理上要面對過去都好不安,有點唔知點做,諗起連伴侣都唔敢識,好可怕。求指示。

Hello​:ok_woman:t2:首先回應返有關下面有一粒粒嘢嘅情況,「性病椰菜花」係睇落似椰菜花嘅性病疣,經由人類乳突病毒(HPV)感染,佢會喺性器官或者周圍出現痕癢但唔痛嘅淡紅色肉粒,形狀多為細小粒狀、扁平或菜花狀,但會生得比較不規則,突起嘅大小唔一樣,更加可能會越長越大,而且小肉粒會逐漸增加成簇,一圈一圈好似椰菜花,所以你可以先觀察你所指嘅情況係咪同上述描述相似,再決定幾時去睇醫生。

至於有關心理狀況,好明白即使性病已經完全康復,但係要面對過去或者之後認識伴侶都帶俾你無形嘅壓力,但都想話俾你聽呢一啲嘅過去唔代表你嘅全部,而且呢一啲嘢都唔可以去定斷你係一個點樣嘅人。如果之後認識新朋友或者伴侶,你係可以選擇同唔同對方講,又或者講幾多, 係呢一方面唔需要覺得自己有一個責任一定要講。同時都可以探討一下你覺得用邊一種方式可以令自己心理上舒服啲,又或者建立正面啲嘅想法。因為「冇人會介意呢啲嘢啦」,「你唔使諗得咁負面喎」,呢啲說話相信都唔係帶俾你安慰,反而令你更加唔知點樣做。所以你可以諗吓你想用咩方法去面對,正視呢樣嘢,例如確立一套自己對性行為嘅守則?認識唔同安全措施?了解更多有關性健康嘅知識?可能嚟緊有好長嘅時間你都會帶着負面嘅角度去思考呢樣嘢,但希望你過咗呢個階段都會更了解自己,同埋更加愛自己:smiling_face_with_three_hearts::yellow_heart: