對異性親密接觸有恐懼?

唔知點解呢半年黎開始驚啲男仔(曖昧對象、男朋友)對自己有親密接觸,例如攬、錫、摸,好驚會有性病,知道性病經性行為/體液/血液傳播,但都見到有啲係經皮膚接觸傳播,覺得好污糟,甚至會懷疑對方之前有冇咩唔安全性行為而有性病。

同曖昧對象出街,我自己性需求都算中等,但係佢話想開房我即刻say no,又試過捉住我隻手隔住條褲摸佢下面,又攬我又錫我,我翻到屋企即刻沖涼,將啲衫丟入洗衣機單獨洗⋯
好抗拒,唔知係潔癖定係有恐懼:disappointed:

Hello​:ok_woman:t2:相信潔癖同埋恐懼都有好直接嘅關係,同埋其實你都講得啱呀,有時冇帶安全套嘅性行為,都有機會感染性病,所以你喺呢一方面有安全意識都係一件值得欣賞嘅事。但你對親密關係嘅呢一種擔心係咪開始令你覺得困擾?又或者你覺得同男性相處上係咪只要比較親密,或者接觸到性嘅時候都會出現呢個情況?如果只係普通嘅相處又會唔會出現以上情況,或者其他潔癖嘅問題?

多謝你reply我:pleading_face:
唔知係咪唔信任對方定係點,曖昧對象之前有四次拍拖經驗,佢聲稱淨係同兩個ex有安全性行為,但係依家一遇到好似佢呢種比較主動同埋進取嘅男仔,內心會諗對方係咪啲好隨便嘅人,會唔會之前試過同非女朋友關係嘅女仔搞過等等,總之會覺得好污糟,好驚呢啲男仔會有所隱瞞
除非好了解好了解對方?因為以前同埋依家都見過唔少背叛另一半,出軌等等嘅case,為左保護自己,好似對所有男仔建立唔到喺性呢方面嘅信任⋯

Hello 明白你都可能唔係咁放心,或者唔係咁信任到對方。其實信任都要一啲時間去建立嘅,有啲人可能可以好快就信任到對方,有啲人可能就要比較長嘅時間,所以都唔需要怪責自己。

而且好似性行為咁,有啲人可能覺得曖昧對象已經可以有比較親密嘅接觸,有啲人又覺得只要拍咗拖就可以幾時都發生性行為,有啲人又會覺得拍咗拖至少都要有一定嘅時間或者一定嘅信任先可以發生性行為,有啲人更加覺得要結咗婚之後先可以發生性行為。

想講嘅係,每個人對於性行為嘅想法或者理解都會有唔同,千祈唔好因為對方嘅身份,或者膽對方嘅關係,而勉強自己強迫自己同對方發生性行為,咁樣都唔係一個健康良好嘅情況。

如果可以,或者你想嘅話,或者都可以嘗試搵個機會同對方講吓你嘅感受,坦誠咁同對方表達你嘅顧慮,睇吓會唔會可以令對方明白你嘅想法,或者對方可以因為咁而比到更加多信任或者安全感你?又或者可以係溝通之下,同對方搵到一個有共識嘅方案?