好似沉咗船 點算

同對方係交友app識
本身只係傾咸計
冇見過面 大家唔知大家咩樣
不過慢慢傾咗一陣 就傾日常
知道對方都係單身
再傾咗一排 發覺自己好似沉咗船
點算好
應該點做
應唔應該試試約對方出街
定係應該點做
有冇人可以教教路
利申a0毒撚

Hello~ 多謝你同我哋分享你嘅感情煩惱啊:yellow_heart: 見你同對方可以由傾咸計去到傾日常,似乎都幾啱傾幾夾喎~ 我估你宜家最大嘅煩惱,應該係唔肯定自己係唔係鍾意對方,亦都唔知道對方對你有咩感覺,有無發展嘅機會:thought_balloon: 始終文字嘅溝通有唔少限制,例如大家對同一個emoji嘅解讀都可以好唔同,所以如果你好想了解對方多啲嘅話,其實約出嚟都未嘗唔係一個可以考慮嘅選擇啊~ 不過當然都要睇下對方嘅意願,如果對方想維持文字上嘅交流先嘅,咁都可以keep住傾下日常了解對方多啲先啊:smiling_face:

不過都要提一提嘅係,網上識嘅唔一定會中伏,但都的確有唔少騙徒:warning: 所以如果真係約出嚟,記住喺公眾地方見面,亦都建議你事先話俾朋友或者屋企人知,咁樣萬一有咩事佢哋都知道你咩時間會喺邊度,記住有咩唔對路嘅話,你係絕對有權中途離開嘅!

最後,見你提到自己未拍過拖所以唔知點做,其實唔洗因為咁而太緊張或覺得自己唔好啊:sparkles: 只要遇到啱嘅人,你做返自己,順住自己嘅感覺行就已經足夠㗎喇:smiling_face_with_three_hearts:

有咩疑問歡迎再同我哋分享:speech_balloon:

但係好驚會破壞關係…
驚講咗話約出嚟 對方會唔喜歡
然後連本身關係都冇埋…
有冇話應該識幾耐先約
有冇話講咩約佢出嚟
好驚好驚

第一次約出嚟都真係唔易呀:face_holding_back_tears:會有好多擔心同緊張

如果你都係認真想同佢發展關係嘅,不妨可以了解吓佢嘅諗法同興趣先,再投其所好,約佢做啲大家都有興趣嘅嘢:rofl:至於時間上,其實真係冇一個標準答案,你可以試探吓佢對要約出嚟見面嘅接受程度,睇下佢有無興趣同你單獨出街。如果佢都可能想見下面,再加上做啲大家都有興趣嘅嘢,咁我相信約出嚟嘅機會同成功率都會大啲!:laughing:

確實嘅,冇嘢會係百分之百嘅肯定,總會有失敗嘅可能,所以有做好被拒絕嘅可能都好緊要:smiling_face_with_tear:不過都唔洗太妄自菲薄,覺得自己就一定唔成功,我覺得經營同發展一段關係最講求嘅就係真心同埋誠意。我相信透過真誠嘅相處同溝通,就算真係有唔喜歡嘅部分,反而仲可以藉此了解大家嘅喜好呢~

最後,我覺得人同人之間嘅相處都好睇唔同嘅因素影響。假如對方真係會因為你嘅一啲外在條件,又或者好單純只係因為大家唔適合大家而「唔喜歡」你,可能佢都未必係最適合你嘅人選:face_holding_back_tears:唔好因為人地嘅諗法而定義咗自己,每個人都有佢好嘅一方面。