我5/2食完二代事後，理應8號嚟M，但到宜家都未嚟M（3/2同4/2性行為後5/2食事後）自己前日琴日今日check過陰性（性行為後15-17日驗，不過唔知準唔準）怕自己有問題，而且D分泌物有咸腥味。下圖係今日check （係性行為後17日驗）
Hello, 睇返你最新嘅驗孕結果係顯示無懷孕，咁就唔使擔心意外懷孕嘅。原因係驗孕棒透過檢測尿液中嘅hCG (人絨毛膜促性腺激素)含量，呢款激素會係受精卵著床後開始大量分泌，而一般受精著床呢個過程需要6-9日，所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。你係性行為第17日驗孕而結果無懷孕係可信㗎。
至於未嚟M係因為事後丸嘅成份係高劑量嘅荷爾蒙，所以服用事後丸後會對身體產生副作用，例如導致下一次月經提前/推遲，影響嚟月經嘅日數同經血量。事後丸嘅副作用一般會影響到一至兩個月經週期。
一般來講，陰道分泌物平時有啲味（可能係小小酸酸地或者輕微腥味）係正常嘅。有留意自己分泌物狀態嘅習慣係好好嘅，因為陰道分泌物亦都會反映到陰道嘅健康情況。如果出現下體/性器官痕癢灼痛嘅情況，或者分泌物嘅顏色、氣味、質地變得異常，例如出現黃綠色嘅分泌物，質地變成蛋白豆腐渣狀，或者有魚腥味等，咁就要睇醫生啦。