陰道分泌物

我之前食抗生素之後就有豆腐渣分泌物 下體有啲痕同腫 睇醫生話係敏感 開咗藥膏比我 而家冇痕同腫 但係仲有豆腐渣分泌物 係唔係仲有其他問題:smiling_face_with_tear:

Hello, 一般嚟講,正常嘅陰道分泌物應該係透明蛋清狀嘅,宜家出現好似豆腐渣咁嘅分泌物有機會係陰道出現念珠菌感染(念珠菌感染唔係性病,不過可以經性行為傳播嘅,用藥就可以痊愈)。建議你睇醫生,確認返係咪念珠菌感染或有其他婦科情況,咁就安心啦。

而念珠菌係不論男女,每個人身體都會有嘅,係身體健康嘅時候,呢隻菌對身體係無影響。但只要抵抗力下降,或者天氣變得潮濕悶熱,都會令佢大量繁殖,造成發炎。所以日常生活上除咗令自己有充足休息,保持抵抗力之外,唔好比自己咁大壓力。呢啲都係影響抵抗力嘅因素。同埋有時着得多貼身同唔透氣嘅內褲或者緊身褲都會令陰道位置變得潮濕,令細菌容易繁殖。著啲透氣嘅衣物同埋恆常用清水輕輕清潔外陰都可以有助保持衛生,減少細菌繁殖。

補充多少少,如果分泌物多嘅時候建議使用護墊,避免分泌物接觸到內衣物令到內衣物濕咗變成細菌嘅溫床加劇病情,不過使用護墊要勤更換,如果唔係就會反效果又變咗細菌嘅溫床,大約2-3小時就要更換一次新嘅護墊啦。