女朋友15/2嚟完一次M，我哋喺嗰日同埋17/2都進行過無套性行為，但係冇內射，19/2亦都進行左一次性行為，不過有安全套，但係進行期間因為潤滑不足安全套穿咗一次，已經馬上退出來然後更換避孕套立即換嘅避孕套先再繼續，但係女朋友琴日開始覺得有啲肚痛，到咗今日佢覺得縮肚嘅時候小腹痛，而且去完廁所嘅時候發現有啡色嘅血同埋血絲，而家我哋兩個都好驚唔知係屬於正常月經定係懷孕初期出血，諗住今晚買驗孕棒聽日測試，想問吓工作人員有幾大機會懷孕。
p.s，佢今年過生日17歲，我18，但係想問吓家計會進行終止受孕係咪需要18歲以上嘅成年人陪同，如果我夠咗18歲可唔可以同佢去進行中止受孕？
Hello, 無安全措施（例如戴安全套）嘅性行為係會有懷孕嘅風險。不過都欣賞你係19/2嘅性行為有做安全措施而且係性行為期間發現安全套穿咗都有立即更換新嘅安全套。
而懷孕初期出血又叫「著床性出血」，一般著床性出血嘅血量較少，顏色較淺，可能會少至只有一滴血，部分人可能血量會多少少。血量係護墊可以承載嘅血量，通常只會一日內一瞬間流完，並唔會似月經咁持續黎4-5日。著床性出血時亦唔會好似黎月經咁身體有劇烈感覺（例如肚痛、頭暈等）。
認同你同伴侶使用驗孕棒驗孕，因為驗孕係一個最直接知道有冇懷孕嘅方法。驗孕棒嘅原理係透過檢測尿液中嘅hCG (人絨毛膜促性腺激素)含量，當受精卵著床後開始大量分泌，而一般受精著床呢個過程需要6-9日，所以係性行為後7日使用驗孕棒的話會有初步嘅結果，而係11日後驗孕結果就更加準確。因為hCG嘅分泌會隨著懷孕嘅日子增加。所以你於愈後嘅日子驗孕，就會因為體內嘅hCG會愈多，而愈容易得到準確嘅驗孕結果 。
至於終止懷孕方面，因為終止懷孕終於係一個重大嘅醫療程序。所以喺香港未滿18歲嘅人士，要合法咁進行終止懷孕手術嘅話，都需要女方嘅家長或法定監護人簽署手術同意書，同埋需要有兩名醫生同意，先可以做到手術。法例係為左保障女方嘅權益同埋安全，因為萬一手術過程中發生咩事，家長或者法定監護人都可以知道並作出緊急手術決定，當然一切嘅決定都要以接受手術者嘅利益為依歸。
而屋企背景較複雜的話，可能會由社工作為監護人代簽手術同意書。仔細嘅意思即係指，屋企有特殊情況，法庭判決你家長唔再適合作為你嘅法定監護人，並由法庭判決由你其他家人／親戚，或者社工／其他相關人士作為你嘅法定監護人，咁呢位監護人就可以代簽手術同意書。
如果唔係以上特殊情況的話，原則上未滿18歲進行終止懷孕等手術，都係需要搵番家長去簽署手術同意書，保障女方。
要瞞住家人進行終止懷孕手術的話，坊間可能會有人選擇唔合法嘅方式，去黑市又或者內地醫院墮胎，覺得可以避過好多爭執或者家庭壓力，但無可否認本身終止懷孕手術係會有風險，甚至令身體出現手術後副作用／短期影響。去黑市墮胎或者內地墮胎，更可能因為手術環境及質素參差，存在更大嘅醫療風險。
你好，我諗嘅終止懷孕係指藥物方法，唔係透過手術，咁會唔會有唔同
即使係藥物方法，如果未滿十八歲，都一樣係要家長或者法定監護人簽署手術同意書嘅。
唔知你哋驗咗孕未呢？如果驗到結果係陰性嘅話，咁就唔使太擔心啦，不過下次都記得要做好安全措施。如果真係驗到結果係有咗嘅話，而又想進行終止懷孕手術嘅話，對於呢方面有任何擔心，想知道更仔細嘅情況嘅話，都歡迎你搵我哋，或者搵其他可靠可信嘅啲人或者機構都係可以嘅。
驗左冇事