會唔會懷孕

2月19日嘅時候同男朋友無套做左,佢外射左係我背脊,唔知會唔會流到入去,同埋因為自己本身經期都唔準,有試過會唔黎,無特登mark低幾號:face_holding_back_tears::pray:t2:好驚咁樣會唔會中,同埋呢個月都試過兩次無套,不過無射,但係都驚啲液有少量精子所以中。請問咁樣懷孕嘅機會有幾大?因為仲係未成年所以好擔心。

hello你好啊

見到曾經發生過無套性行為,雖然無射精,但係興奮時所分泌嘅尿道球腺液都可能會有精子,所以係有懷孕嘅風險,唯一可以知道自己有無懷孕嘅方法就係驗孕。

驗孕棒係透過檢測尿液中嘅hCG (人絨毛膜促性腺激素)含量,呢款激素會係受精卵著床後開始大量分泌,而一般受精著床呢個過程需要6-9日,所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。

係到都想了解下唔用安全措施嘅原因,除咗懷孕外,無套性行為亦有感染性病嘅風險。明白依加依個階段未能夠承擔意外懷孕嘅風險,所以都建議使用安全措施,例如安全套、避孕藥等,可以有效大大減低懷孕嘅機會,而安全套更可以預防性病傳播。假如對方表示唔想用安全套嘅,希望你可以畀佢知你嘅感受同諗法,如果對方仍然要求唔用安全套嘅情況下發生性行為,我地係絕對可以拒絕嘅,並唔係因為對方嘅身分(例如另一半),就一定要順從佢。假如未有計劃生育,性行為嘅每一方都有責任選用適合嘅安全措施,對自己同埋對方都有一份保障。你都可以同佢溝通返,唔應該係你單方面去承擔懷孕嘅風險,你哋雙方都有權同埋有責任去用商議用咩安全措施並達成共識。