食咗Yaz一年，並且都係好規律固定時間服藥。
2月6號開始因確診尿道炎而食咗5日抗生素 (nitrofurantoin)，10號同11號有性行為同埋有內射。
跟住2月14號食完24粒避孕藥，16號因尿道炎復發而再食抗生素，19號M到並且開左新一盒藥。24號有發生過性行為，但都係有用安全套。
呢幾日突然有出現流啡的症狀，補充返先，最近精神壓力係好大，因為就快要轉工，唔知會唔會都有影響。
想請問咁樣會唔會有懷孕風險? 定係因為抗生素的影響而導致我食左避孕藥一年之後先出現流啡?
Hello, 抗生素係可能會降低避孕藥嘅效果，進而增加懷孕嘅風險。因為避孕藥原理係藥中嘅雌激素被腸內嘅益菌循環再用，令雌激素係身體維持一個穩定水平。但抗生素能殺死腸內嘅益菌，令雌激素從身體流失，影響避孕藥效果。建議諮詢返你嘅醫生了解抗生素 (nitrofurantoin)會唔會對避孕藥藥效有影響，醫生會因應你嘅情況可能開唔影響避孕藥嘅藥物同埋會提供返相應嘅建議俾你，例如需要使用額外嘅避孕措施(安全套)。
係感染尿道炎第一次性行為期間(2月10及11號)，因為無使用安全套係會有懷孕風險嘅。其實唔建議係感染期間或未完成抗生素療程期間發生性行為，即使感覺症狀緩和好多 / 感覺好咗 / 係抗生素療程後期，其實個病毒有可能仍然存在體內或未完全清哂。因為性行為係容易傳播病毒嘅途徑有機會傳染俾伴侶，而之後嘅性行為可能再傳染返俾自己形成交叉感染或容易復發嘅。
咁係感染尿道炎第二次性行為期間(2月24號)，有使用安全套懷孕風險係相對低嘅。因為咁樣可以額外提供保護，減少懷孕風險嘅。
至於，流啡可能係由於多種因素引起嘅，包括荷爾蒙變化、壓力、生活作息轉變、飲食習慣改變、最近服食藥物等，係正常嘅現象。你提到最近有精神壓力增加，咁可能係造成流啡嘅其中一個原因。而服用抗生素都可能對你嘅身體產生一啲影響，導致出現流啡。建議你可以觀察多幾日，流啡有機會係月經前嘅出血情況，咖啡色嘅小出血或者血絲屬於子宮內膜崩落嘅一部分，先係小量月經崩落出血，再嚟就係月經。如果之後幾日正常嚟月經咁就冇太大嘅問題。另外，分泌物無任何異味，亦無唔舒服嘅感覺，咁都唔需要太擔心。
如果你對自己嘅情況感到擔憂，最好嘅做法係進行驗孕。驗孕棒係透過檢測尿液中嘅hCG (人絨毛膜促性腺激素)含量，呢款激素會係受精卵著床後開始大量分泌，而一般受精著床呢個過程需要6-9日，所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。所以只要喺適當嘅日子之後，同埋使用可以喺註冊藥房買到嘅驗孕棒，並且跟足說明書嘅指引，其實準確度會係非常高。