好驚 點算

14/2 同男朋友錫完,冇做過佢都冇入過冇內射過,但佢就有用手插過我幾下,唔係好入嘅。上個月4/2 開始嚟M 去到依家都未嚟, 19/2 病咗 食咗抗生素,琴晚仲無端端失眠,呢幾日有時會突然嬲23-26/2 仲流過啡,依家有啲擔心

Hello~聽你嘅情況,意外懷孕嘅機會極低,所以唔需要太擔心:raised_hands:

首先,因為懷孕係需要精子同卵子嘅結合,而你提到你同男朋友無發生過陰道交,就算指交前佢手指有接觸過含有精子嘅尿道球腺液 (Pre-Cum),但因為係間接接觸,精子都好大機會已經死亡,所以都唔會令你意外懷孕。

至於你擔心遲遲未嚟M,正常嚟講每個人嘅生理周期都唔同,而且唔一定固定,只要喺23-35日之内都屬於正常範圍。同時,月經都會受生活壓力、藥物等因素影響,而你最近有食抗生素,同埋可能因為壓力而失眠、情緒起伏大,呢啲都反映體內荷爾蒙水平正在變化,所以的確有機會延期月經到來嘅。

而流啡情況出現喺月經週期嘅中期,其實係排卵期出血,意思係當卵巢排卵後,黃體素濃度唔足夠時,子宮內膜可能會有微量剝落,出現少量出血或者咖啡色嘅分泌物,形成「排卵期出血」。 當黃體素濃度穩定之後,出血嘅狀況就會自行停止,一般維持兩至三日,血量較少,都係正常生理現象,通常係唔需要治療亦唔會對健康構成影響。

所以唔需要太擔心會意外懷孕:raised_hands: