事前藥食法

你好呀,想開始試吓食事前藥,但係具體要點食,真係不是很清楚,是否嚟M第一日開始食?食到幾時先可以無套

Hello @Jin , 普遍事前避孕藥係經期嚟既第1日就食既話,第7日就已經開始有藥效,達到避孕既效果。如果係經期後先開始食,就需要食藥滿14日之後就可以達到避孕功效,而係呢段期間如果發生性行為,都建議使用額外嘅安全措施,例如安全套。但都建議你食之前,先諮詢醫生嘅意見,因為唔係每一個人都適合食某種牌子嘅避孕藥。

咁我見有28粒藥,即係話我食咗頭七粒之後就有避孕效果,咁佢個效果係去到幾時呢?食完頭七粒係咪都要繼續食?咁我食完一盒咁係咪要繼續買新一盒食?

係呀!其實事前避孕藥係一種透過持續服用而產生果效嘅荷爾蒙式避孕方法。所以只要你一直準時並正確服用事前藥,而冇停藥嘅話,除咗第一次食藥嘅頭七日以外,之後接連服用時都會即時做到避孕嘅效果。

事前避孕藥有分21粒同28粒裝,兩種都需要每日服食一粒(最好差唔多嘅時間)。而28粒裝比較特別嘅係,完成一排後,即刻開新一排繼續服用就可以了,中間唔洗停藥,可以減低漏服機會,啱哂啲比較善忘或者怕麻煩嘅朋友仔。而因為28粒裝嘅藥入面其實會會有4粒含非活性成分嘅藥丸(白色藥丸),通常係食緊呢4粒嘅時候,就會嚟月經~但亦都因為咁,記住留意自己前面24日食緊嘅藥,並唔係呢四粒非活性成份嘅藥丸(基本上跟返藥丸後面嘅指示就可以了!)

最後都想提提你,雖然事前避孕藥喺香港並非醫生處方藥,購買嘅途徑亦比較方便。不過我都建議你第一次服藥前諮詢醫生意見,揀取合適自己嘅藥物,同時醫護人員亦會教你點樣正確服用避孕藥。如果有需要而你未過25歲,都可以第一次考慮去家計會買藥,咁就會包咗上面所講嘅醫生檢查,同埋護士教食藥嘅程序㗎啦!

唔好意思,我都係唔係好明,既然食咗頭七粒就有藥效,咁其餘嘅藥有咩用,因為我一開始以為食晒28粒先有藥效

Hello, 多謝你嘅提問。

講下避孕藥原理先,避孕藥屬於荷爾蒙避孕法,透過人造荷爾蒙抑制排卵,改變子宮頸分泌物黏稠度同埋子宮內膜環境,令精子難以通過同埋受精卵難以着床,從而達到避孕嘅功效。

係服初期,身體需要時間適應同建立藥效,而建立藥效要幾耐時間,就視乎你係幾時開始食。

正如我哋同事咁講,通常會建議經期頭5日或以內開始食藥,咁就會快啲建立到藥效,咁食藥嘅頭7日都要配合用安全套。但都唔係話必須要係經期開始食,你亦可以係其他日子開始食都得,不過就要比較長時間先建立到藥效。如果經期第6日或者之後先開始食第一粒藥,咁就建議頭14日都配合用安全套。

事前避孕藥係要定時同持續咁食,先保持到藥效。如果斷咗冇食身體嘅荷爾蒙會逐漸恢復原本嘅水平,就會失去藥效。另外,食緊嘅週期中間漏食嘅話,都係會影響藥效嘅。所以食完一盒28粒裝之後再開個新嘅28粒裝繼續食,就可以保持避孕藥效。