停用避孕藥後 月經冇嚟?

一直食開優X事前避孕藥,同另一半喺3月13號進行無套外射性行為後,喺16/17號就決定永久停食避孕藥。當時避孕藥食完24粒,餘下4粒非活性冇食。

本身預計會喺18-21號呢幾日嚟M,但最後到今日26號都仲未嚟。期間25號夜晚曾經試過用驗孕棒,但都係陰性,想問點解會咁?懷孕機會大唔大?

Hello, 多謝你嘅提問,逐個回覆你呀。

懷孕機會方面,係3月16/17號前一直有持續食用事前避孕藥,身體嘅避孕藥效仍然持續,所以係3月13號進行性行為嘅懷孕風險係極低,而且你係性行為後11日驗孕結果係陰性,係性行為越後嘅日子驗孕個結果越準確,所以懷孕機會係零。

而係停藥(即3月16/17號)後,身體就會即時恢復生育能力,亦會有懷孕嘅機會。所以停藥後如果無戴安全套發生性行為,就會有懷孕嘅風險。

停藥後未嚟M,係因為停止服用避孕藥之後,身體需要一段時間先會恢復自然分泌荷爾蒙同埋排卵嘅狀態。至於需要幾耐先可以恢復到,情況就會視乎你服藥嘅時間,同埋你本身嘅身體狀況。一般避孕藥停藥後1至2個月內就會回復自然嘅排卵及月經週期,月經週期以及經血量會回復番未服用避孕藥之前嘅情況,停藥後初期月經週期亦會比較唔準確 。另外,都有好多唔同因素影響月經週期,例如飲食、休息、壓力、生病、服用藥物等對月經週期都會有影響。

1個讚

感謝你嘅回覆,想問嗰4粒非活性冇食其實係咪冇影響?當中係咪零藥物成份?

因為我本身早已決定喺16/17號食完第28粒藥就以後唔再食(包括4粒非活性也不),但咁啱遇上經期,而又冇嚟M,所以先非常擔心。而我13號之後都係未有性行為嘅,所以應該好低機會懷孕吧…我怕夜晚check唔準,驗孕棒是否需要早上先check呢?

唔好意思!我記錯咗,17號都有無套外射性行為!即係上一次性行為唔係13號…而最後一粒藥係17號食咗,而家咁風險係咪好高?

但係咪除咗尋晚check咗之後 今晚我都check咗,都係陰性。

Hello, 嗰4粒非活性藥丸冇食係無影響嘅,非活性藥丸係不含藥性嘅,而安排非活性成分藥丸嘅主要目的,係希望大家能夠維持持續服藥嘅習慣,唔會因為突然停藥,而打亂服藥嘅習慣或者漏服左避孕藥。

至於驗孕方面,喺性行為之後11日驗孕,得到嘅結果都已經係準確㗎啦。因為驗孕棒係要驗尿液入面嘅hcg值(人絨毛膜促性腺激素)濃度嚟判定有冇懷孕。當受精卵著床後,體內會開始分泌hCG,一般嚟講性行為11日之後,如果真係有懷孕嘅話,尿液中嘅hCG濃度已經足夠驗孕棒驗到出嚟。而晨尿驗孕嘅原因,係因為hcg濃度會更高,不過如果喺性行為嘅第11日後驗孕,即使唔係晨尿,都已經有足夠嘅hcg,可以得到準確嘅結果。

避孕藥一直食到17號,身體嘅避孕藥效仍然持續緊,所以係當日有無套外射性行為嘅懷孕風險好低。如果仍然唔放心,你亦可以考慮用電子顯示嘅驗孕棒,因為如果真係懷孕的話,佢亦會顯示懷孕週數,亦可以免卻咗人為失誤而導致無準確咁閱讀驗孕棒上面嘅線,準確度同可靠度都會更加高。

1個讚

感謝你嘅回覆,28號早上再驗孕棒check咗都係陰性!由16號最後一次食避孕藥、17號進行最後一次無套性行為到而家、25同26號驗孕棒又係陰性,以上種種跡象到今日咁樣顯示,係咪懷孕機會係接近零?但到今時今日都係仲未月經到,已經遲咗10日,請問需唔需要睇醫生?

Hello~如果由17號開始計起,28號剛好係11日後,所以如果28號檢測嘅結果都係飲陰性嘅話,咁你懷孕嘅機會真係極低。不過都要提醒返你,因爲避孕藥一旦停服,就會失去避孕效果,而精子喺身體最多可存活2-3天,所以都會有一定風險,建議如果之後停服避孕藥,最好都係使用返安全套作避孕。

至於月經遲嚟嘅問題,其實月經週期因人而異,只要喺23-35日内都屬於正常範圍。而且月經都會受唔同因素影響,例如情緒、壓力、藥物、生活作息轉變等,所以都可以繼續留意住身體狀況,如果真係好遲都未嚟月經,都建議諮詢醫生嘅意見,睇吓會唔會需要做一啲催經嘅措施。