事前藥會令經期亂嗎?

今日已經係食緊第10日事前藥,我係嚟M第一日食,但係我去到今日仲嚟緊M,我平時都唔會嚟咁耐,而且佢同平時啲M唔一樣,好似比較黏稠,而且只係好少量。想問咁樣正唔正常?使唔使停止服用?唔知係咪因為我食藥每日都唔定時,因為我慣咗放學之後食,但係我每日放學嘅時間都唔一樣,有時四點有時七點

Hello, 首先都提一提服用事前避孕藥之前要諮詢醫生嘅意見,因為每個人嘅體質都唔一樣,適合嘅避孕藥都唔同嘅。服用避孕藥初期都需要俾身體大概三個月至半年嘅時間適應,而服用初期有機會出現呢啲常見嘅副作用,乳房 / 胸口漲痛、噁心、陰道不規則出血 / 流啡、頭暈、心情低落等等。副作用通常唔會太嚴重,一般嚟講會喺服藥後嘅一段時間後(1-3月後)副作用會慢慢消失,情況因人而異。

至於你而家出現嘅少量不規則陰道出血 / 流啡係服藥初期嘅常見副作用,係正常現象嚟嘅。呢個情況下,你可以照常依指示服藥,理論上事前避孕藥都會令經期慢慢變得規律。如果覺得副作用比較嚴重嘅話,可以考慮諮詢醫生嘅意見,睇吓會唔會係呢一款事前避孕藥唔適合你。

事前避孕藥主要分為單一荷爾蒙同混合荷爾蒙兩種,單一荷爾蒙避孕藥相對混合荷爾蒙避孕藥對定時服用有較嚴謹嘅要求,需要每日準時服藥以維持藥效,而如果你服用嘅係混合荷爾蒙避孕藥,服藥時間相對無咁嚴謹,早/遅兩至三個鐘服用,唔會影響藥效嘅。不過都建議每日定時服用避孕藥建立習慣,避免唔覺意漏服咗。