又有啲困惑/疑惑

Hello
我想問我喺22/3-25/3大約呢段時間其間有啡色分泌物,應該係啡流,之後就冇咗,直到琴晚1/4又開始出現,到今日都仲有d,對上一次經期係7/3-13/3,想問吓呢兩段時間嘅啡流係因為咩原因
P.s.冇發生過性行為
同埋我之前如果到排卵期嘅話佢會有胸痛嘅情況出現,跟住去到下一次M到先至冇,但係今次竟然冇,所以我都唔知自己到排卵期未,但係正常應該都唔會有兩段時間出現啡流嘅情況(?

補充番少少:啡流但唔完全係啡色,係偏黑少少嘅嗰種啡

Hello, 啡色分泌物,俗稱流啡,係身體荷爾蒙水平改變時會發生嘅現象,係正常嘅。當精神壓力過大、生活作息有轉變、飲食習慣改變、最近有服食藥物等都會影響荷爾蒙水平。建議你可以觀察多一段時間。

流啡有機會係月經前嘅出血情況,如果之後幾日正常嚟月經咁就冇太大嘅問題。如果係經期之後嘅流啡,有機會因為經血未全部排出,所以尚未流完嘅經血會以流啡嘅方式排出。你提到啡流偏黑少少係因為子宮內膜啱啱開始脫落時,未必好快會流出體外,而喺呢段時間內經血入面嘅鐵質會氧化,令到經血變啡同埋有明顯鐵鏽味嘅。如果流啡嘅情況持續,或者喺下一個月經周期又出現同樣嘅情況,就建議諮詢下醫生嘅意見。另外,分泌物無任何異味,亦無唔舒服嘅感覺,咁都唔需要太擔心。

1個讚

我應該點樣知道自己係唔係處於排卵期,因為我之前排卵期會胸脹同痛,或者會有明顯嘅唔舒服,所以我就知自己係處於排卵期,同埋今次冇,不過就有好輕微嘅腹痛,1分鐘內結束嗰啲,所以我就唔知完咗排卵期未

Hello, 排卵期同月經週期一樣受到好多因素影響,例如荷爾蒙分泌、飲食習慣、休息、壓力、藥物等等。理論上排卵期會係月經週期嘅一半嘅前5日至後4日,不過要月經週期比較穩定先可作參考。

要判斷幾時係排卵期有三種方法:

第一種計日數,即係月經週期法。首先需要知道自己嘅月經周期長度。呢度係指從一次月經嘅第一日開始,到下一次月經嘅第一日開始嘅日子數。通常,月經周期係 21 至 35 天之間,但每個人都唔同。一般嚟講,排卵發生係下次月經嚟之前大約 14 日。所以,從你嘅月經周期長度減去 14 日,呢個會得到大約嘅排卵日期。假設你嘅月經週期是係28 日,咁排卵通常發生係呢 28 日內,即係第 14日。如果你嘅月經周期係 30 日,咁排卵通常發生係第 16 日。

第二種就係你而家用緊嘅方法,觀察身體嘅變化狀況。例如基礎體溫(Basal body temperature,BBT) 偏高。可以每朝早一瞓醒就量一次體溫,然後記錄落嚟。喺排卵之前,體溫會稍微下降,而排卵後嘅24小時,體溫就會升高,並持續幾日。通常喺排卵前,女性嘅基礎平均體溫會係36.1°C~36.4°C之間,排卵後,會上升到36.4°C~37°C~

除咗體溫升高之外,排卵期仲有其它的徵兆:

  • 陰道分泌物增加:分泌物通常會係透明而有彈性,質地好似生蛋白一樣,而排卵之後分泌物可能會變少,並顯得更濃或更混濁。
  • 卵巢疼痛:腹部單側感到不適或疼痛。
  • 陰道些微地出血
  • 乳房壓落去會痛
  • 性慾增加

第三種係用排卵試紙或者排卵棒做測試,會更準確知道排卵期。

咁我想問吓如果我去廁所抹幾時可見到紙巾上面係有血嘅,會帶有少少血塊同埋應該帶有啲透明分泌物,但係尿液係冇變紅色,同埋只係需要用到護墊,但係唔係每次都流到出嚟,護墊上面完全冇嘢,但係去廁所抹嘅時候就有血係咩原因

因為今次已經係呢個月嘅第二次出血,講緊嘅係持續咗2-3/3-4日嗰種,但又唔係正常月經,懷疑今個月係未排卵

再補充返,如果護墊上有血,咁我抹嘅時候就冇(或者會有幾滴,相反如果護墊上冇血,咁我抹嘅時候就會有血,但又唔係正常M到嘅時候嘅血量,完全唔知咩事

如果係咁,都有機會係排卵期出血。

因為你提到嗰啲血係得幾滴,又只係持續兩至三日左右,顏色亦都係偏黑而唔係鮮紅,亦都有少少透明分泌物,呢啲都有機會排卵期出血嘅現象。所以有機會就係啱啱排卵。而其實每個人每次排卵期都未必會有相同嘅情況,所以的確未必咁容易察覺到。

不過你都可以留意番呢種出血情況有冇持續,血液有冇變鮮紅色,出血量有冇變多,身體有冇嚴重腹痛,或者身體有冇其他嘅唔舒服。如果有嘅話,最好就睇醫生了解清楚啦。

1/4開始有血,係偏啡色嘅,有時黑黑地。

今日(4/4)晏晝嘅時候去廁所見到血量多咗,成塊護墊都係血,仲要漏咗啲出嚟(血係紅嘅)之後我估應該係M到,跟住我都係換護墊。我換完之後就冇再流,冇成塊都係,只係得大約一個$5硬幣嘅大細(?左右嘅位置有血。去到啱啱我睇嘅時候啲顏色已經淡咗
如果係排卵期出血嘅話應該唔會係咁架喎(?

Hello

見到岀血情況都一直困擾住你,上邊同事亦列舉咗有關排卵期出血嘅資訊,假如出血狀況同過往月經周期嘅情況唔同,我地始終都唔係最熟悉你身體狀況嘅人,所以都建議可以睇醫生,了解返自己身體狀況。

見到過往都岀現過類似情況,如果你覺得月經唔規律呢件事都令你好困擾嘅,你可以考慮食避孕藥,服用某啲避孕藥有令到經期規律、經血量減少、減少經前同經期不適嘅情況。食藥之前記得要去睇醫生,檢查身體情況係咪適合同埋適合邊款避孕藥。而且避孕藥喺正確服用嘅情況下有99%嘅避孕成功率,如果你將來想發生性行為嘅話,都可以提供避孕功效。 :wink:

我想問一問會唔會有情況係冇排卵但有月經嘅出現:face_with_monocle:

的確係有依個情況岀現嘅,例如多囊卵巢綜合症、 卵巢早衰、 精神心理因素都有可能導致無排卵性月經,但我地都唔能係下定論,月經同排卵係好容易受到唔同身體因素影響,例如荷爾蒙分泌、飲食、作息、壓力、藥物等等。而且排卵期其實要等月經出現之後,先可以推算返幾時排左卵。而高溫或分泌都只係排卵期一啲可能出現嘅狀況,亦唔等於一定係排卵期。除非喺醫護人員嘅指導下每日用排卵試紙測試,否則我哋好難準確咁知道究竟幾時排卵。